وفاقی وزیر برائے اقتصادی امور کی جائیکا کو مین لائن ون منصوبے میں شریک مالی معاونت پر غور کرنے کی دعوت

اسلام آباد (اُردو پوائنٹ اخبارتازہ ترین - اے پی پی۔ 05 اگست2026ء) وفاقی وزیر برائے اقتصادی امور احد چیمہ نے جاپان انٹرنیشنل کوآپریشن ایجنسی (جائیکا )کو مین لائن ون (ML-1) ریلوے منصوبے میں شریک مالی معاونت پر غور کرنے کی دعوت دیتے ہوئے کہا کہ ایشیائی ترقیاتی بینک اور دیگر ترقیاتی شراکت دار اس اہم منصوبے کی حمایت کر رہے ہیں۔ انہوں نے یہ بات انہوں نے جائیکا کے صدر ڈاکٹر تاناکا آکی ہیکو کی قیادت میں ملاقات کرنے والے اعلیٰ سطحی وفد سے گفتگو کی کی۔

ملاقات میں پاکستان اور جاپان کے درمیان ترقیاتی تعاون کو مزید فروغ دینے اور پاکستان کے ترجیحی شعبوں میں جائیکا کے تعاون کو وسعت دینے کے مختلف پہلوؤں پر تفصیلی تبادلۂ خیال کیا گیا۔وفاقی وزیر نے جائیکا کے صدر اور وفد کا خیرمقدم کرتے ہوئے پاکستان کے ساتھ جائیکا کی سات دہائیوں پر محیط شراکت داری کو سراہا اور کہا کہ جاپان کی جانب سے تقریباً 11.7 ارب امریکی ڈالر کی سرکاری ترقیاتی معاونت نے پاکستان میں توانائی، ٹرانسپورٹ انفراسٹرکچر، صنعت، زراعت، آبی وسائل، صحت، تعلیم اور سکیورٹی سمیت مختلف شعبوں کی ترقی میں کلیدی کردار ادا کیا ہے۔

(جاری ہے)

ملاقات کے دوران وفاقی وزیر نے جائیکا کو مین لائن ون (ML-1) ریلوے منصوبے میں شریک مالی معاونت پر غور کرنے کی دعوت دیتے ہوئے کہا کہ ایشیائی ترقیاتی بینک اور دیگر ترقیاتی شراکت دار اس اہم منصوبے کی حمایت کر رہے ہیں۔ انہوں نے کہا کہ ایم ایل ون کی جدید خطوط پر تعمیر سے پاکستان کے ٹرانسپورٹ نظام کو مضبوط بنانے، تجارت کے فروغ، صنعتی روابط بہتر بنانے اور پائیدار معاشی ترقی کو تقویت ملے گی۔

اس موقع پر ڈاکٹر تاناکا آکی ہیکو نے منصوبے کی اہمیت کو تسلیم کرتے ہوئے کہا کہ جائیکا اس تجویز پر مثبت انداز میں غور کرے گی۔احد چیمہ نے ہنرمند افرادی قوت کی تیاری کو پاکستان کے انسانی وسائل کی ترقی کے لیے ناگزیر قرار دیتے ہوئے کہا کہ جدید تقاضوں سے ہم آہنگ مہارتوں کی فراہمی ملکی اور بین الاقوامی لیبر مارکیٹ کی ضروریات پوری کرنے میں معاون ثابت ہوگی۔

جائیکا کے صدر نے اس تجویز کی حمایت کرتے ہوئے کہا کہ ادارہ مستقبل کے منصوبوں میں اس شعبے کو شامل کرنے پر غور کرے گا۔وفاقی وزیر نے ڈیجیٹل معیشت کی بڑھتی ہوئی اہمیت کا ذکر کرتے ہوئے دیہی علاقوں میں انٹرنیٹ انفراسٹرکچر کی بہتری کے لیے جائیکا کے تعاون کی درخواست بھی کی، تاکہ فری لانسرز، کاروباری افراد اور ای کامرس کے شعبے کو مزید فروغ دیا جا سکے۔

ڈاکٹر تاناکا آکی ہیکو نے اس تجویز کو سراہتے ہوئے کہا کہ یہ اقدام جامع معاشی ترقی میں اہم کردار ادا کر سکتا ہے۔انہوں نے بڑے ترقیاتی منصوبوں کے لیے معیاری فزیبلٹی اسٹڈیز کی تیاری میں بھی جائیکا سے تعاون کی درخواست کی اور کہا کہ مؤثر منصوبہ بندی سرمایہ کاری کے حصول اور منصوبوں کی کامیاب تکمیل کے لیے بنیادی حیثیت رکھتی ہے۔ جائیکا کے صدر نے یقین دہانی کرائی کہ فزیبلٹی اسٹڈیز ادارے کی بنیادی مہارتوں میں شامل ہیں اور اس سلسلے میں حکومتِ پاکستان کو مکمل تعاون فراہم کیا جائے گا۔

احد چیمہ نے پاکستان کے سیاحتی شعبے، خصوصاً گندھارا تہذیب اور فنون سے متعلق تاریخی مقامات کے تحفظ، بحالی اور ترقی میں تعاون کی ضرورت پر بھی زور دیا۔ انہوں نے کہا کہ اس شعبے میں مشترکہ کوششیں نہ صرف ثقافتی سیاحت کو فروغ دیں گی بلکہ پاکستان اور جاپان کے عوام کے درمیان روابط بھی مزید مضبوط ہوں گے۔ ڈاکٹرتاناکا آکی ہیکو نے اس تجویز کا خیرمقدم کرتے ہوئے اس پر سنجیدگی سے غور کرنے کی یقین دہانی کرائی۔

وفاقی وزیر نے وفد کو پاکستان کی معاشی صورتحال سے آگاہ کرتے ہوئے کہا کہ حکومت محتاط معاشی نظم و نسق اور جامع ساختی اصلاحات کے ذریعے طویل المدتی معاشی استحکام اور پائیدار ترقی کے حصول کے لیے پرعزم ہے۔ انہوں نے کہا کہ آئی ایم ایف کے اسٹینڈ بائی ارینجمنٹ کی کامیاب تکمیل کے بعد ایکسٹینڈڈ فنڈ فیسلٹی اور ریزیلینس اینڈ سسٹین ایبلٹی فیسلٹی کے تحت پاکستان کی پیش رفت اطمینان بخش رہی ہے اور ملک نے تمام مقداری کارکردگی اہداف کامیابی سے حاصل کیے ہیں۔

انہوں نے مزید کہا کہ مسلسل اصلاحات اور بہتر ہوتے ہوئے معاشی اشاریوں کی بدولت پاکستان کی معیشت استحکام اور مضبوطی کی راہ پر گامزن ہے۔ جائیکا کے صدر نے حکومت کی معاشی اصلاحات اور اقتصادی بنیادوں کو مستحکم بنانے کی کوششوں کو سراہا۔ملاقات میں دونوں جانب سے پاکستان اور جاپان کے درمیان ترقیاتی شراکت داری کو مزید مضبوط بنانے کے عزم کا اعادہ کیا گیا اور اس بات پر اتفاق کیا گیا کہ انفراسٹرکچر، انسانی وسائل کی ترقی، ڈیجیٹل تبدیلی، سیاحت اور دیگر باہمی دلچسپی کے شعبوں میں نئے مواقع تلاش کرنے کے لیے قریبی تعاون جاری رکھا جائے گا، تاکہ پاکستان میں پائیدار اور جامع معاشی ترقی کو فروغ دیا جا سکے۔

پاکستان اور جاپان کے درمیان دیرینہ ترقیاتی شراکت داری کو مزید وسعت دینے کے لیے دونوں ممالک انفراسٹرکچر، ریلوے، ہنرمند افرادی قوت، ڈیجیٹل معیشت، سیاحت اور دیگر اہم شعبوں میں تعاون بڑھانے پر متفق ہیں۔ جائیکا نے گزشتہ 7 دہائیوں کے دوران پاکستان کی سماجی و اقتصادی ترقی میں نمایاں کردار ادا کیا ہے اور حکومت مستقبل میں بھی اس مؤثر شراکت داری کو مزید مضبوط بنانے کی خواہاں ہے۔