بجلی بلوں میں اضافے کا امکان، لیسکو نے سہ ماہی ایڈجسٹمنٹ کی درخواست نیپرا کو بھجوا دی

بجلی کے استعمال میں نمایاں کمی واقع ہوئی‘اخراجات پورے کرنے کے لئے فی یونٹ قیمت میں اضافہ ضروری ہے. لیسکو کی عجیب منطق

میاں محمد ندیم جمعرات 6 اگست 2026 16:43

بجلی بلوں میں اضافے کا امکان، لیسکو نے سہ ماہی ایڈجسٹمنٹ کی درخواست ..

لاہور(اردوپوائنٹ اخبارتازہ ترین-انٹرنیشنل پریس ایجنسی۔06 اگست ۔2026 ) لاہور الیکٹرک سپلائی کمپنی (لیسکو)نے بجلی صارفین سے اضافی وصولیوں کےلئے نیپرا سے رجوع کرلیا، کمپنی نے سہ ماہی ٹیرف ایڈجسٹمنٹ کی مد میں 2 ارب 35 کروڑ روپے اضافی وصول کرنے کی درخواست دائر کردی.

(جاری ہے)

دستاویزات کے مطابق لیسکو نے اپریل سے جون کے دوران بجلی کی پیداوار اور فروخت میں فرق، کیپسٹی چارجز، ایندھن کی قیمتوں میں اضافے، نیٹ میٹرنگ صارفین کے سسٹم پر اثرات، ٹرانسمیشن چارجز اور دیگر اخراجات کی مد میں اضافی رقم مانگی ہے لیسکو کا موقف ہے کہ بجلی کی فروخت میں کمی کے باعث فی یونٹ لاگت میں اضافہ ہوجاتا ہے،دستاویزات کے مطابق گھریلو صارفین نے گزشتہ سال کے مقابلے میں 8 فیصد جبکہ کمرشل صارفین نے 7 فیصد کم بجلی استعمال کی،کمپنی میں مجموعی طور پر بجلی کے استعمال میں تقریبا 4 فیصد کمی ریکارڈ کی گئی. لیسکو کے مطابق بجلی کی فروخت کم ہونے سے نظام کے اخراجات پورے کرنے کے لئے فی یونٹ قیمت میں اضافہ ضروری ہوجاتا ہے سہ ماہی ٹیرف ایڈجسٹمنٹ کی درخواست پر منظوری دینے یا مسترد کرنے کا حتمی فیصلہ نیپرا کرے گی، منظوری کی صورت میں اضافی رقم بجلی صارفین کے بلوں میں شامل کی جاسکتی ہے.