صوابی،ٹوبیکو بورڈ کی جانب سے تمباکو کی کم قیمت پر خریداری، کاشتکاروں کا احتجاج، مقررہ نرخ پر خریداری کا مطالبہ

تمباکو کاشتکاروں کا استحصال کیا جا رہا ،کم قیمت پر خریداری کاشتکاروں کے ساتھ ظلم اور قانون کی خلاف ورزی ہے، رضوان اللہ خان

منگل 11 اگست 2026 19:35

صوابی (اُردو پوائنٹ اخبارتازہ ترین - این این آئی۔ 11 اگست2026ء) تمباکو کے کاشتکاروں کی تنظیموں نے پاکستان ٹوبیکو بورڈ کی جانب سے مقرر کردہ نرخ سے کم قیمت پر تمباکو کی خریداری پر تشویش کا اظہار کرتے ہوئے حکومت اور پی ٹی بی سے مطالبہ کیا ہے کہ مقررہ نرخ پر کاشتکاروں سے تمباکو کی خریداری یقینی بنانے کیلئے عملی اقدامات کیے جائیں۔اس سلسلے میں کسان بورڈ کے مرکزی نائب صدر رضوان اللہ خان، صوبائی جنرل سیکرٹری عبدالصمد صافی، ضلعی صدر صوابی خالد خان، خان محمد خان، سلیمان صافی اور معراج محمد نے صوابی کے دورے کے موقع پر اسسٹنٹ ڈسٹرکٹ آفیسر پاکستان ٹوبیکو بورڈ حماد سے ملاقات کی۔

ملاقات میں غیر قانونی پرچیزنگ اور مقررہ قوانین کے مطابق تمباکو کی خریداری نہ ہونے کے حوالے سے تفصیلی تبادلہ خیال کیا گیا۔

(جاری ہے)

رضوان اللہ خان نے کہا کہ مارکیٹ میں تمباکو کے کاشتکاروں کا استحصال کیا جا رہا ہے۔ انہوں نے پاکستان ٹوبیکو بورڈ سے مطالبہ کیا کہ تمام پرچیزنگ کمپنیوں کو قانون اور مقررہ نرخ کے مطابق تمباکو خریدنے کا پابند بنایا جائے۔

بعد ازاں رضوان اللہ خان اور دیگر رہنماں نے پاکستان ٹوبیکو کمپنی، خیبر ٹوبیکو کمپنی اور فلپ مورس ٹوبیکو کمپنی کے پرچیزنگ مراکز کا دورہ کیا اور تمباکو کی خریداری کے عمل کا جائزہ لیا۔ اس موقع پر رضوان اللہ خان نے کہا کہ کم قیمت پر تمباکو کی خریداری کاشتکاروں کے ساتھ ظلم اور قانون کی خلاف ورزی ہے، جس کی وہ شدید الفاظ میں مذمت کرتے ہیں۔

انہوں نے پاکستان ٹوبیکو کمپنی اور فلپ مورس ٹوبیکو کمپنی سے مطالبہ کیا کہ موجودہ صورتحال میں کاشتکاروں کیلئے یہ انتہائی مشکل سال ہے، اس لئے انہیں ہر ممکن ریلیف فراہم کیا جائے۔انہوں نے کہا کہ ڈپٹی کمشنر صوابی طارق اللہ کی زیر صدارت ہونے والے اجلاس میں بھی ہدایت کی گئی ہے کہ تمام ایسے لوکل پرچیزنگ پوائنٹس کو بند کیا جائے جو مبینہ طور پر غیر قانونی طور پر تمباکو کی خریداری کر رہے ہیں۔

کسان رہنمائوں کے مطابق 8جولائی سے اب تک بعض مقامات پر کاشتکاروں سے تمباکو 500روپے فی کلو سے کم قیمت پر خریدا گیا ہے، جو ان کے بقول کاشتکاروں کے ساتھ ناانصافی ہے۔ کسان بورڈ خیبرپختونخوا کے صوبائی جنرل سیکرٹری عبدالصمد صافی نے تمباکو کے کاشتکاروں کو ہونے والے نقصانات کا ذمہ دار مرکزی حکومت، پاکستان ٹوبیکو بورڈ اور صوبائی حکومتوں کو قرار دیتے ہوئے مطالبہ کیا کہ کاشتکاروں کے حقوق کا تحفظ کیا جائے۔