سید خورشید شاہ نے امراض قلب ہسپتال سکھر میں دل کی دھڑکن کے علاج کے جدید یونٹ کا افتتاح کردیا

بدھ 12 اگست 2026 17:34

سکھر (اُردو پوائنٹ اخبارتازہ ترین - اے پی پی۔ 12 اگست2026ء) رکن قومی اسمبلی سید خورشید شاہ نے ایس آئی سی وی ڈی ہسپتال سکھر میں جدید کارڈیک الیکٹروفزیالوجی خدمات کا افتتاح کر دیا ، دل کی دھڑکن کی بے ترتیبی کے علاج کی جدید سہولت دستیاب ہے ۔ رکنِ قومی اسمبلی اور پاکستان پیپلز پارٹی کے مرکزی رہنما سید خورشید احمد شاہ نے ایگزیکٹو ڈائریکٹر سندھ انسٹی ٹیوٹ آف کارڈیو ویسکیولر ڈیزیز (SICVD) سکھر پروفیسر ڈاکٹر جاوید اکبر سیال کے ہمراہ ایس آئی سی وی ڈی سکھر میں جدید کارڈیک الیکٹروفزیالوجی (EP) خدمات کا افتتاح کردیا۔

جدید سہولیات کی فراہمی سے شمالی سندھ سمیت پنجاب اور بلوچستان کے ملحقہ علاقوں سے آنے والے مریض بھی دل کی دھڑکن کی بے ترتیبی کے جدید علاج سے مستفید ہوسکیں گے۔

(جاری ہے)

اس موقع پر ایس آئی سی وی ڈی کے سی او ڈاکٹر محمد موسیٰ میمن ، ڈاکٹر ساجد علی شیخ، ڈاکٹر جاوید شیخ، ڈاکٹر ہاشم کلوڑ، ایس آئی سی وی ڈی سکھر کے ایڈمنسٹریٹر بھرت کمار سمیت دیگر افسران اور ڈاکٹرز بھی موجود تھے۔

اس موقع پر بریفنگ میں بتایا گیاکہ ایس آئی سی وی ڈی سکھر میں الیکٹروفزیالوجی کی خدمات پہلے سے فراہم کی جارہی تھیں، تاہم اب ان میں مزید توسیع کرتے ہوئے جدید کیتھیٹر ابلیشن اور کارڈیک ڈیوائس امپلانٹیشن کی سہولیات بھی شامل کردی گئی ہیں۔ ان سہولیات کے ذریعے اریتھمیا یعنی دل کی دھڑکن کی بے ترتیبی کی تشخیص اور علاج مزید مؤثر انداز میں کیا جاسکے گا۔