یوم آزادی کے موقع پر ڈیرہ غازی خان میں سکیورٹی انتظامات مکمل، پولیس کی بھاری نفری تعینات

جمعرات 13 اگست 2026 21:30

ڈیرہ غازی خان (اُردو پوائنٹ اخبارتازہ ترین - اے پی پی۔ 13 اگست2026ء) ریجنل پولیس آفیسر ڈیرہ غازی خان محمد اظہر اکرم کے احکامات پر یوم آزادی کے موقع پر ڈیرہ غازی خان، مظفرگڑھ، راجن پور، کوٹ ادو اور لیہ میں فول پروف سکیورٹی انتظامات مکمل کر لیے گئے ہیں۔ترجمان ڈیرہ غازیخان پولیس کے مطابق شہریوں کے تحفظ، امن و امان کے قیام اور یوم آزادی کی تقریبات کو پرامن بنانے کے لیے پولیس کو ہائی الرٹ کر دیا گیا ہے۔

انہوں نے کہا کہ ریجن بھر میں یوم آزادی کے حوالے سے مجموعی طور پر 38 تقریبات منعقد ہوں گی، جن میں ڈیرہ غازی خان میں 12، مظفرگڑھ میں 7، راجن پور میں 8، کوٹ ادو میں 10 اور لیہ میں ایک تقریب شامل ہے۔ ان تقریبات کی سکیورٹی کے لیے 16 ڈی ایس پیز، 8 انسپکٹرز، 241 سب انسپکٹرز و اے ایس آئیز سمیت 1116 پولیس اہلکار تعینات کیے گئے ہیں۔

(جاری ہے)

ترجمان نے مزید بتایا کہ سکیورٹی انتظامات کے تحت ایلیٹ فورس کی 17، کوئیک رسپانس فورس کی 8، پٹرولنگ گاڑیوں کی 53 اور موٹر سائیکل اسکواڈ کی 37 ٹیموں کے علاوہ ڈولفن اسکواڈ کے دستے بھی مختلف علاقوں میں گشت کریں گے۔

اس کے علاوہ تقریبات میں داخلے کے مقامات پر 9 واک تھرو گیٹس اور 106 میٹل ڈیٹیکٹرز کے ذریعے شرکاء کی تلاشی لی جائے گی، جبکہ تقریبات اور حساس مقامات کی نگرانی کے لیے 153 سی سی ٹی وی کیمرے نصب کیے گئے ہیں۔انہوں نے کہا کہ آر پی او محمد اظہر اکرم کے احکامات پر 13 اور 14 اگست کی درمیانی شب سمیت یوم آزادی کے روز شہریوں کے تحفظ کے لیے خصوصی سکیورٹی انتظامات کیے گئے ہیں۔

تمام شہروں کے تفریحی مقامات اور اہم مقامات پر پکٹس اور ناکہ جات قائم کرکے اضافی نفری تعینات کر دی گئی ہے۔اس علاوہ پارکوں اور دیگر تفریحی مقامات پر آنے والی فیملیز اور خواتین کے تحفظ کے لیے لیڈیز پولیس اہلکار بھی تعینات ہوں گی۔ترجمان نے کہا کہ خواتین کو ہراساں کرنے یا شہریوں سے دست درازی کرنے والوں کے خلاف سخت قانونی کارروائی عمل میں لائی جائے گی۔ یوم آزادی کے موقع پر حکومت پنجاب کی جانب سے جاری کردہ ایس او پیز پر مکمل عملدرآمد یقینی بنایا جائے گا۔انہوں نے والدین سے اپیل کی کہ یوم آزادی کے موقع پر اپنے بچوں پر کڑی نظر رکھیں اور انہیں ون ویلنگ جیسے خطرناک اور خونی کھیل سے دور رکھیں تاکہ کسی بھی سنگین حادثے یا پریشانی سے محفوظ رہا جا سکے۔