بجلی فی یونٹ مسلسل 3 ماہ تک مہنگی ہونے کا امکان

سہ ماہی ایڈجسٹمنٹ کے تحت فی یونٹ بجلی ایک روپے 34 پیسے تک مہنگی ہوسکتی ہے، صارفین پر 34 ارب روپے کا اضافی بوجھ پڑنے کا خدشہ

جمعرات 13 اگست 2026 22:05

کراچی(اُردو پوائنٹ اخبارتازہ ترین - این این آئی۔ 13 اگست2026ء) کراچی سمیت ملک بھر کے بجلی صارفین کے لیے فی یونٹ بجلی مسلسل تین ماہ تک مہنگی ہونے کا امکان ہے۔ نیشنل الیکٹرک پاور ریگولیٹری اتھارٹی (نیپرا) کے مطابق سہ ماہی ایڈجسٹمنٹ کے تحت بجلی کے نرخ میں ہر ماہ ایک روپے 34 پیسے فی یونٹ تک اضافہ کیا جاسکتا ہے۔ذرائع کے مطابق بجلی کی تقسیم کار کمپنیوں کی جانب سے سہ ماہی ایڈجسٹمنٹ کے تحت نرخوں میں اضافے کی درخواست پر نیپرا نے سماعت مکمل کرنے کے بعد فیصلہ محفوظ کرلیا ہے۔

(جاری ہے)

اتھارٹی درخواستوں اور متعلقہ اعداد و شمار کی مکمل جانچ پڑتال کے بعد حتمی فیصلہ جاری کرے گی۔ذرائع کا کہنا ہے کہ مجوزہ اضافے کی منظوری کی صورت میں صارفین کو مسلسل تین ماہ تک اضافی ادائیگیاں کرنا پڑسکتی ہیں، جس سے بجلی کے بلوں میں مزید اضافہ ہوگا۔ذرائع کے مطابق بجلی کے نرخوں میں مجوزہ اضافے سے صارفین پر مجموعی طور پر تقریباً 34 ارب روپے کا اضافی بوجھ پڑنے کا امکان ہے۔نیپرا کی جانب سے حتمی فیصلہ جاری ہونے کے بعد ہی واضح ہوسکے گا کہ بجلی کے نرخوں میں فی یونٹ کتنا اضافہ کیا جاتا ہے اور اس کا اطلاق کن صارفین پر کس مدت کے لیے ہوگا۔