راولپنڈی واقعے کو لانگ مارچ کی بوکھلاہٹ کیوجہ سے پی ٹی آئی سے جوڑا جارہا ہے، شفیع جان

کسی بھی شخص کے انفرادی عمل کی ذمہ داری تحریک انصاف پر عائد نہیں کی جاسکتی، لانگ مارچ ہر صورت ہوگا، وزیر اطلاعات

جمعہ 14 اگست 2026 19:50

پشاور(اُردو پوائنٹ اخبارتازہ ترین - این این آئی۔ 14 اگست2026ء) وزیر اطلاعات خیبر پختونخوا شفیع جان نے راولپنڈی کے مال روڈ پر پیش آئے واقعے کی مذمت کرتے ہوئے کہا ہے کہ کسی شخص کے انفرادی فعل کی ذمہ داری پی ٹی آئی پر عائد نہیں کی جاسکتی، 27 ستمبر کے لانگ مارچ کی بوکھلاہٹ کی وجہ سے وفاقی وزرا واقعے کو پی ٹی آئی سے جوڑ رہے ہیں۔ وزیراطلاعات و نشریات شفیع جان نے وزیر مملکت برائے داخلہ طلال چوہدری کی پریس کانفرنس پر ردعمل دیتے ہوئے کہا کہ راولپنڈی مال روڈ پر پیش آنے والا فائرنگ کا واقعہ انتہائی افسوسناک اور قابل مذمت ہے۔

انہوں نے کہا کہ پاکستان تحریک انصاف ایسے کسی واقعے کی حمایت کرتی ہے اور نہ ہی ساتھ کھڑی ہے، کسی شخص کے انفرادی فعل کی ذمہ داری پاکستان تحریک انصاف پر عائد نہیں کی جا سکتی۔

(جاری ہے)

شفیع جان نے کہا کہ وفاقی حکومت کے جعلی وزرا ایک فرد کے انفرادی عمل کو بنیاد بنا کر پی ٹی آئی کے خلاف زہر اگل ر ہے ہیں، واقعے کے ایک گھنٹے بعد ہی عطا تارڑ نے پی ٹی آئی کے خلاف بیان بازی شروع کی۔

انہوں نے کہا کہ انتشار پسند جماعت کون ہے، شاید طلال چوہدری بھول گئے ہیں مگر قوم ماڈل ٹاؤن کا واقعہ نہیں بھولی، پنجاب حکومت اور پولیس کی سرپرستی میں گلو بٹ کے کردار کو قوم نہیں بھولی، مسلم لیگ (ن) کے کارکن ماضی میں سپریم کورٹ پر بھی حملہ آور ہوئے تھے، طلال چوہدری یہ واقعہ بھی یاد رکھیں۔شفیع جان نے کہا کہ طلال چوہدری کو اصل خوف 27 ستمبر کے لانگ مارچ کا ہے، اسی خوف اور بوکھلاہٹ میں وفاقی وزرا واقعے کو پاکستان تحریک انصاف سے جوڑ رہے ہیں، مینڈیٹ چور حکومت کے وزراء خیبرپختونخوا حکومت کی کارکردگی پر بات کرنے سے پہلے وفاق اور پنجاب کی کارکردگی قوم کے سامنے پیش کریں۔

اٴْن کا کہنا تھا کہ طلال چوہدری حوصلہ رکھیں، وزیراعلیٰ سہیل آفریدی کی قیادت میں 27 ستمبر کا لانگ مارچ ہر صورت ہوگا۔ وزیر اطلاعات نے کہا کہ پاکستان تحریک انصاف ہمیشہ آئین اور قانون کی پاسداری پر یقین رکھتی ہے۔