Live Updates

ٹیکسلا: ٹک ٹاکر شمشو بی بی عرف عائشہ کے قتل کے حوالے اہم پیشرفت سامنے آگئی

والد کا کوثر اور شاہین نامی دو افراد پر اپنی بیٹی کے ساتھ مالی معاملات اور مبینہ دھمکیوں کا الزام، شمشو نے ان کیخلاف اسلام آباد میں پہلے بھی شکایت درج کرائی تھی

ثنااللہ ناگرہ پیر 17 اگست 2026 20:08

ٹیکسلا: ٹک ٹاکر شمشو بی بی عرف عائشہ کے قتل کے حوالے اہم پیشرفت سامنے ..

ٹیکسلا (اردوپوائنٹ اخبار تازہ ترین۔ انٹرنیشنل پریس ایجنسی۔ 17 اگست 2026ء ) ٹیکسلا میں ٹک ٹاکر شمشو بی بی عرف عائشہ کے قتل کے حوالے اہم پیشرفت سامنے آگئی، والد نے کوثر اور شاہین نامی دو افراد پر اپنی بیٹی کے ساتھ مالی معاملات اور مبینہ دھمکیوں کا الزام کرتے ہوئے کہا کہ شمشو نے ان کیخلاف اسلام آباد میں پہلے بھی شکایت درج کرائی تھی۔ اے آروائی نیوز کے مطابق والد نے کاشف عرف کاشی کے کردار پر بھی سوالات اٹھائے، کاشی نے مبینہ طور پر فائرنگ سے کچھ دیر قبل شمشوبی بی بی کو فون کیا تھا۔

مقتولہ کے والد نے شبہ ظاہر کیا کہ نامزد افراد قتل میں براہِ راست ملوث بھی ہوسکتے ہیں یا پھر مبینہ طور پر کسی کے ذریعے بھی حملہ کرایا جاسکتا ہے۔ خاندانی ذرائع کے مطابق شمشوبی بی بی گزشتہ 3 سے 4 سال سے ٹک ٹاک پر ویڈیوز بناتی تھیں اور فالوورز کی تعداد تقریباً 13 لاکھ تک جبکہ اکاؤنٹ پر 3 کروڑ سے زائد لائکس بھی ہوچکے تھے۔

(جاری ہے)

ٹک ٹاکر کی موت کے بعد اہلخانہ نے ٹک ٹاک اکاؤنٹ ڈی ایکٹیویٹ کردیا۔

دوسری جانب تھانہ ٹیکسلا کے علاقے میں مشہور ٹک ٹاکر شمسو بی بی عرف عائشہ کو گزشتہ روز فائرنگ کر کے قتل کر دیا گیا جس کی سی سی ٹی وی ویڈیو سامنے آ گئی۔پولیس کے مطابق مقتولہ گزشتہ تقریبا چار سال سے ٹک ٹاک پر سرگرم تھی۔ ایف آئی آر میں الزام عائد کیا گیا ہے کہ شمسو بی بی کا کوثر اور جاوید عرف شاہین کے ساتھ لین دین کا تنازع تھا اور وہ مبینہ طور پر ملنے والی دھمکیوں سے اہلخانہ کو متعدد بار آگاہ کرچکی تھی۔

ٹک ٹاکر پر حملے کی سی سی ٹی وی ویڈیو سامنے آ گئی۔ جس میں دیکھا جا سکتا ہے کہ موٹر سائیکل سوار 2 ملزمان نے گاڑی پر فائرنگ کر دی۔معروف ٹک ٹاکر شمسو بی بی کے ٹک ٹاک اکانٹ پر تقریبا 13 لاکھ فالوورز تھے۔ مقتولہ کو گردن میں گولی لگی۔ایف آئی آر کے مطابق مقتولہ کو کاشف کاشی نامی شخص نے فون کرکے بلایا، جس کے بعد وہ اپنی بہن اور بھائی کے ہمراہ گاڑی میں گھر سے روانہ ہوئی۔

ایف آئی آر کے مطابق نجی پیٹرول پمپ کے قریب موٹرسائیکل سوار ملزمان نے گاڑی پر فائرنگ کر دی، جس کے نتیجے میں شمسو بی بی کو گولیاں لگیں۔ فائرنگ کے بعد گاڑی ڈمپر سے جا ٹکرائی، جس کے باعث مقتولہ کی 15 سالہ بہن بھی زخمی ہو گئی۔ مقتولہ کے والد کی درخواست پر ٹیکسلا پولیس نے مقدمہ درج کر لیا گیا۔ ایف آئی آر میں الزام لگایا گیا ہے کہ ملزمان نے رقم ہڑپ کرنے کی غرض سے شمسو بی بی کو خود یا نامعلوم ساتھیوں کے ذریعے قتل کروایا۔ پولیس نے واقعے کی تحقیقات شروع کر دیں۔