اپوزیشن کی سیاست ختم ہوچکی ہے اور اب ملاقاتوں کے حوالے سے ہمدردی کارڈ کھیل رہی ہے ،طلال چوہدری

پیر 17 اگست 2026 21:44

اسلام آباد(اُردو پوائنٹ اخبارتازہ ترین - آن لائن۔ 17 اگست2026ء) وزیر مملکت برائے داخلہ سینیٹر طلال چوہدری نے کہاہے کہ اپوزیشن کی سیاست ختم ہوچکی ہے اور اب ملاقاتوں کے حوالے سے ہمدردی کارڈ کھیل رہی ہے ،انہوں نے کہاکہ بانی کے بیٹے اپنے والد سے ملنے پاکستان نہیں آرہے ہیں جبکہ پوری دنیا میں گھوم رہے ہیں۔سوموار کو ایوان بالا میں نکتہ اعتراض پر بات کرتے ہوئے وزیر مملکت برائے داخلہ سینیٹر طلال چوہدری نے کہاہے کہ یہ تحریک انقلاب لانے اور نظام بدلنے سے شروع ہوئی تھی اور اب یہ بات ملاقات تک آگئی ہے۔

انہوں نے کہاکہ ایک قانونی اور انسانی معاملہ ہے اور دوسرا سیاست کا معاملہ ہے۔ان کی سیاست ملاقات اور انسانی ہمدردی تک آگئی ہے۔انہوں نے کہاکہ عدالتوں میں بانی پی ٹی آئی کی صحت اور ملاقاتوں کے حوالے سے پٹیشن لگی ہے اور اس میں جو حقائق ہیں اس میں بتایا گیا ہے کہ بشری بی بی اور عمران خان کی 84ملاقاتیں ہوچکی ہیں۔

(جاری ہے)

انہوں نے کہاکہ پی ٹی آئی کے ساتھ اب ہمدردی کارڈ باقی رہ گیا ہے۔ان کے دونوں بچوں کے نائیکوپ درست ہیں اور وہ تین سالوں سے اپنے باپ سے ملنے نہیں آرہے ہیں۔انہوں نے کہاکہ اپوزیشن سیاسی رویہ اختیار کرے۔انہوں نے کہاکہ اپوزیشن مذاکرات کی میز پر واپس آئیں اور بات کریں۔انہوں نے کہاکہ بانی پی ملاقاتیں جیل مینول اور عدالت کی اجازت سے ہونگی۔۔۔۔۔اعجاز خان