زمبابوے کے آٹھ کھلاڑی تربیتی کیمپ میں شرکت کیلئے سمارٹ قلندرز ہائی پرفارمنس سینٹر پہنچ گئے ہیں،ترجمان

منگل 8 ستمبر 2026 22:58

لاہور (اُردو پوائنٹ اخبارتازہ ترین - اے پی پی۔ 08 ستمبر2026ء) لاہور قلندرز اور زمبابوے کرکٹ کے درمیان کھلاڑیوں کے تبادلے کا پروگرام کامیابی سے جاری ہے، جس کا مقصد دونوں ممالک کے نوجوان کرکٹرز کو جدید تربیت، تجربہ اور اپنی صلاحیتوں کے اظہار کے بہتر مواقع فراہم کرنا ہے۔ ترجمان لاہور قلندر کے مطابق دونوں کرکٹ اداروں کے درمیان شروع کیا گیا یہ پروگرام اب تک متعدد کھلاڑیوں کے کیریئر میں اہم کردار ادا کرچکا ہے۔

کھلاڑیوں کے تبادلے کا یہ پروگرام 2023 میں شروع ہوا تھا، جس کے تحت زمبابوے کے آٹھ کھلاڑیوں نے لاہور قلندرز کے ہائی پرفارمنس سینٹر میں چار ماہ تک تربیت حاصل کی تھی۔ اس کے جواب میں لاہور قلندرز نے بھی اپنے پانچ فاسٹ بولرز کو زمبابوے بھیجا، جہاں انہوں نے ڈومیسٹک کرکٹ میں حصہ لے کر مختلف کنڈیشنز میں کھیلنے کا قیمتی تجربہ حاصل کیا۔

(جاری ہے)

اس پروگرام کی نمایاں کامیابیوں میں پاکستانی فاسٹ باولر سلمان مرزا کا نام بھی شامل ہے، جنہوں نے زمبابوے میں وائٹ بال اور ریڈ بال کرکٹ میں عمدہ کارکردگی کا مظاہرہ کیا۔

ان کی مسلسل محنت اور شاندار پرفارمنس کے نتیجے میں لاہور قلندرز نے انہیں پی ایس ایل 10 کے لیے منتخب کیا، جہاں انہوں نے ٹیم کی ٹائٹل جیتنے والی مہم میں اہم کردار ادا کیا۔ سلمان مرزا کی بہترین فارم نے انہیں پاکستان کی قومی ٹیم تک بھی پہنچایا۔اسی کامیاب سلسلے کو آگے بڑھاتے ہوئے زمبابوے کے مزید آٹھ کھلاڑی اسلام آباد کے کیپیٹل سمارٹ سٹی میں قائم اسمارٹ قلندرز ہائی پرفارمنس سینٹر پہنچ گئے ہیں، جہاں وہ پانچ ہفتوں پر مشتمل خصوصی تربیتی کیمپ میں حصہ لیں گے۔ کیمپ کے دوران کھلاڑیوں کو جدید تربیتی سہولیات کے ساتھ ساتھ متوازن اور مکمل غذائی منصوبہ، خصوصی فٹنس پروگرام اور کھیل کی تکنیکی مہارتوں کو بہتر بنانے کے لیے ماہرین کی رہنمائی فراہم کی جائے گی۔