گل پلازہ متاثرین کو تنہا نہیں چھوڑا جائے گا، ہر فورم پر آواز اٹھائیں گے، ایم پی پی

جمعرات 10 ستمبر 2026 12:31

کراچی (اُردو پوائنٹ اخبارتازہ ترین - این این آئی۔ 10 ستمبر2026ء) میری پہچان پاکستان (ایم پی پی) کی مرکزی قیادت سے گل پلازہ متاثرین کے وفد نے ملاقات کرکے سانحے کے بعد خاطر خواہ ریلیف نہ ملنے، ملبہ نہ ہٹائے جانے اور تعمیر نو کے عمل میں تاخیر پر شدید تحفظات کا اظہار کیا ہے۔متاثرین نے مرکزی کمیٹی کے انچارج نہال احمد صدیقی، جوائنٹ انچارج فاروق ملک اور لیبر ونگ کے نگران سیف یار خان کو اپنے مسائل سے آگاہ کرتے ہوئے کہا کہ سانحے کے بعد وہ تاحال شدید مشکلات کا شکار ہیں جبکہ بحالی کے عمل میں غیر معمولی سست روی کے باعث ان کے مسائل میں مسلسل اضافہ ہورہا ہے۔

انہوں نے مطالبہ کیا کہ ملبہ فوری طور پر ہٹایا جائے، نقصانات کا شفاف تخمینہ لگاکر ازالے کے اقدامات کیے جائیں اور تعمیر نو کا واضح منصوبہ اور مدت مقرر کی جائے۔

(جاری ہے)

اس موقع پر نہال احمد صدیقی نے وفد کو یقین دلایا کہ ایم پی پی گل پلازہ متاثرین کو تنہا نہیں چھوڑے گی اور ان کے مسائل ہر متعلقہ فورم پر بھرپور انداز میں اٹھائے جائیں گے۔ انہوں نے کہا کہ وزیراعلیٰ سندھ سے متوقع ملاقات میں گل پلازہ متاثرین کی بحالی، مالی امداد، تعمیر نو اور متاثرہ تاجروں کے مسائل کو ترجیحی بنیادوں پر پیش کیا جائے گا۔

فاروق ملک نے کہا کہ متاثرین کے جائز مطالبات پورے کرنا حکومت کی ذمہ داری ہے اور معاملے میں مزید تاخیر ناقابل قبول ہے۔ انہوں نے مطالبہ کیا کہ بحالی کے عمل کے لیے واضح مدت مقرر کی جائے تاکہ متاثرین میں پائی جانے والی بے چینی ختم ہوسکے۔سیف یار خان نے کہا کہ سانحے سے متاثر ہونے والے مزدور، دکاندار اور ان کے خاندان شدید معاشی مشکلات سے دوچار ہیں، اس لیے انہیں فوری مالی امداد فراہم کرنے کے ساتھ آسان شرائط پر قرضے اور متبادل کاروباری سہولیات بھی دی جائیں۔

ایم پی پی کی مرکزی قیادت نے کہا کہ گل پلازہ سانحے کے متاثرین کے نقصانات کا شفاف تخمینہ لگایا جائے اور ان کی بحالی کے لیے مؤثر اور عملی اقدامات کیے جائیں۔ کراچی کے تاجروں اور شہریوں کے تحفظ کے لیے بھی مؤثر پالیسی تشکیل دینا ضروری ہے۔مرکزی قیادت نے اس عزم کا اعادہ کیا کہ گل پلازہ متاثرین کے حقوق کے حصول اور مکمل بحالی تک ایم پی پی اپنی جدوجہد جاری رکھے گی اور حکومت سے مسلسل رابطے میں رہتے ہوئے متاثرین کی آواز ہر متعلقہ فورم تک پہنچائے گی۔