چین،پاکستانی سفارتخانے میں ’’اسلام آباد دی بائیوگرافی کے چینی ایڈیشن کی رونمائی

جمعرات 10 ستمبر 2026 16:07

بیجنگ (اُردو پوائنٹ اخبارتازہ ترین - اے پی پی۔ 10 ستمبر2026ء) بیجنگ میں پاکستانی سفارتخانے میں کتاب ’’اسلام آباد دی بائیوگرافی‘‘ کے چینی ایڈیشن کی رونمائی ہوئی، جو پاکستان اور چین کے درمیان سفارتی تعلقات کے قیام کی 75ویں سالگرہ کی تقریبات کا حصہ ہے۔ تقریب کی میزبانی چین میں پاکستان کے سفیر خلیل ہاشمی نے کی۔ اس اقدام کا مقصد چینی قارئین کو پاکستان کے دارالحکومت اسلام آباد کی تاریخ، ترقی اور ثقافتی شناخت سے روشناس کرانا ہے۔

پاکستانی سفیر نے کتاب کے مصنفین ڈاکٹر آفتاب عظیم اور ڈاکٹر محمد ارشد بھٹی سمیت ان تمام چینی شراکت داروں کا شکریہ ادا کیا جنہوں نے کتاب کو چینی قارئین تک پہنچانے میں کردار ادا کیا۔ پاکستانی سفیر نے اسلام آباد کو ایک ایسا جدید دارالحکومت قرار دیا جو قدیم تہذیبی ورثے سے گہری جڑیں رکھتا ہے۔

(جاری ہے)

انہوں نے کہا کہ یہ کتاب پاکستان کے ماضی اور حال دونوں کو سمجھنے کے لیے ایک قیمتی دریچہ فراہم کرتی ہے۔

انہوں نے امید ظاہر کی کہ کتاب کا چینی ایڈیشن قارئین کو پاکستان کے بارے میں مزید جاننے اور کتاب کے صفحات سے آگے بڑھ کر ملک کو سمجھنے اور دیکھنے کی ترغیب دے گا۔ انہوں نے اس بات پر زور دیا کہ پاکستان اور چین کی دیرینہ دوستی نہ صرف سفارتی اور اقتصادی تعاون کے ذریعے مزید مستحکم ہو رہی ہے بلکہ باہمی سیکھنے، ثقافتی تبادلے اور ایک دوسرے کی تاریخوں اور کہانیوں کو بہتر طور پر سمجھنے کے ذریعے بھی گہری ہو رہی ہے۔ ’’اسلام آباددی بائیوگرافی‘‘ کے چینی ایڈیشن کی اشاعت دونوں ممالک کے درمیان عوامی سطح پر روابط اور ثقافتی تعلقات کے فروغ کی جانب ایک اور اہم قدم ہے جبکہ پاکستان اور چین سفارتی تعلقات کے قیام کی 75ویں سالگرہ منا رہے ہیں۔