Live Updates

ٹرمپ نے سعودی ولی عہد کی حوثیوں کے خلاف کارروائی کی درخواست مسترد کر دی

جمعہ 11 ستمبر 2026 18:11

واشنگٹن(اُردو پوائنٹ اخبارتازہ ترین - این این آئی۔ 11 ستمبر2026ء) امریکی صدر ڈونلڈ ٹرمپ نے حوثیوں کے خلاف حملوں سے متعلق سعودی ولی عہد کی درخواست مسترد کر دی۔امریکی ویب سائٹ کی رپورٹس کے مطابق سعودی ولی عہد محمد بن سلمان نے امریکی صدر سے 2 مرتبہ ٹیلی فونک رابطہ کیا۔دو امریکی حکام کے حوالے سے رپورٹ کرتے ہوئے بتایا کہ حوثی گروپ باب المندب آبنائے کی جانب پیش قدمی کر رہا تھا، جبکہ کل حوثیوں کی موخا کی جانب پیش قدمی اور یمنی افواج کی پسپائی پر سعودی ولی عہد نے ٹرمپ کو فون کیا۔

امریکی حکام کا کہنا تھا کہ سعودی ولی عہد محمد بن سلمان نے ٹرمپ کو فون کر کے بگڑتی ہوئی صورتحال سے آگاہ کیا اور کہا کہ یمن کے حوثیوں کے خلاف کارروائی کی جائے، تاہم ٹرمپ نے یہ درخواست مسترد کر دی۔

(جاری ہے)

انہوں نے کہا کہ فی الحال واشنگٹن کا حوثیوں کے خلاف براہِ راست فوجی کارروائی کا کوئی منصوبہ نہیں۔ٹرمپ انتظامیہ کے ایک سینئر عہدیدار نے بتایا کہ امریکا اپنی بنیادی قومی سلامتی کے مفادات کے تحفظ پر توجہ مرکوز کیے ہوئے ہے، جن میں بحیرہ احمر میں جہاز رانی کی آزادی کو یقینی بنانا شامل ہے۔

امریکی عہدیدار کے مطابق علاقائی سلامتی کے چیلنجز سے نمٹنے اور انہیں حل کرنے میں اپنے علاقائی شراکت داروں کو قائدانہ کردار ادا کرنے کے قابل بنایا جا رہا ہے۔امریکی عسکری اور سول حکام نے حالیہ ہفتوں میں سعودی ہم منصبوں سے رابطہ کیا اور سعودی ہم منصبوں کو بتایا کہ ٹرمپ کی ہدایت ہے کہ امریکی فوج کی توجہ آبنائے ہرمز پر رکھی جائے، صدر ٹرمپ نے کسی نئے محاذ کو کھولنے سے گریز کا کہا ہے۔

رپورٹ میں کہا گیا ہے کہ واشنگٹن سعودی عرب کو انٹیلی جنس معلومات اور اہداف سے متعلق ڈیٹا فراہم کرے گا۔امریکی سینٹرل کمانڈ کے کمانڈر ایڈمرل بریڈ کوپر گزشتہ روز ہنگامی رابطہ اجلاسوں کے لیے سعودی عرب گئے۔رپورٹس کے مطابق تقریبا 200 امریکی فوجی اہلکار پہلے ہی سعودی عرب میں موجود ہیں، جو سعودی عرب کو غیر فوجی معاونت فراہم کر رہے ہیں۔امریکی میڈیا کے مطابق واشنگٹن میں سعودی سفارت خانے اور وائٹ ہائوس نے اس حوالے سے تبصرے سے انکار کر دیا۔