Live Updates

حوثیوں نے یمن میں بحیرہ احمر کے تمام ساحلی علاقے کو کنٹرول کر لیا ہے. یمنی عہدیدار کی تصدیق

مغربی ساحل پر جو کچھ بھی ہمارے کنٹرول میں تھا، وہ سب ہاتھ سے نکل گیا ہے.جلاوطن حکومت کے فوجی عہدیدار کی گفتگو

میاں محمد ندیم ہفتہ 12 ستمبر 2026 00:38

حوثیوں نے یمن میں بحیرہ احمر کے تمام ساحلی علاقے کو کنٹرول کر لیا ہے. ..

صنعا(اردوپوائنٹ اخبارتازہ ترین-انٹرنیشنل پریس ایجنسی۔11 ستمبر ۔2026 ) یمن کے برسراقتدارحوثی گروپ”انصاراللہ“ نے یمن کے پورے بحیرہ احمر کے ساحلی علاقے کا کنٹرول حاصل کر لیا ہے یہ بات بین الاقوامی طور پر تسلیم شدہ یمنی حکومت کے ایک نامعلوم فوجی عہدیدار نے خبر رساں ادارے” اے ایف پی“ کو بتائی ہے. عہدیدار نے بتایا کہ مغربی ساحل پر جو کچھ بھی ہمارے کنٹرول میں تھا، وہ سب ہاتھ سے نکل گیا ہے فوجی عہدیدار کے مطابق حوثیوں نے آبنائے باب المندب میں واقع دو مزید جزائر پر بھی قبضہ کر لیا ہے یہ دعویٰ ان اطلاعات کے بعد سامنے آیا ہے جن میں کہا گیا تھا کہ حوثی گروپ نے عالمی جہاز رانی کے لیے اہم آبی گزرگاہ میں واقع پیریم جزیرے کا کنٹرول بھی حاصل کر لیا ہے.

(جاری ہے)

ادھر سعودی نشریاتی ادارے ”العربیہ“نے بتایا ہے کہ حوثیوں نے جلاوطن حکومت کی حامی فوج کو صوبہ تعز کے جنوب اور مغرب میں واقع علاقوں سے بے دخل کردیا ہے رائٹرز کو جلاوطن یمنی حکومت کے دو ذرائع نے بتایا کہ حوثی افواج ذو باب شہر تک پہنچ گئیں جو مایون جزیرے کے مقابل آبنائے باب المندب پر واقع ہے حکومت کے ایک اور ذریعے نے” اے ایف پی“ کو بتایا کہ ملیشیا نے آبنائے کے وسط میں واقع تزویری اہمیت کے حامل جزیرے مایون پر اپنے دستے تعینات کر دیے تھے.

اسی دوران صوبہ تعز کے علاقوں نیز صوبہ الحدیدہ میں شہریوں کے خلاف حوثیوں کے مظالم کی اطلاعات میں اضافہ ہوا ہے جہاں لڑائی کے نتیجے میں وسیع پیمانے پر نقلِ مکانی شروع ہو گئی ہے یہ پیش رفت اس وقت سامنے آئی جب حوثیوں نے المخا کے اردگرد دوبارہ حملے شروع کیے جبکہ جلاوطن حکومت کی حامی افواج نے یمن کے مغربی ساحل پر اپنی جگہیں تبدیل کیں آزاد ذرائع کا کہنا ہے کہ بحیرہ احمر کی ساحلی پٹی اب مکمل طور پر حوثیوں کے قبضے میں چلی گئی ہے.