Live Updates

حافظ نعیم الرحمان نے 20 ستمبر کو اسلام آباد کی طرف مار چ کا اعلان کردیا

حکومت ہماری ٹیم سے مسلسل مہلت مانگ رہی ہے ‘حکومت نے کہا ہم مجبور ہیں، پیٹرول کی قیمتیں کم نہیں کرسکتے. امیر جماعت اسلامی کا گوجرانوالہ میں جلسہ سے خطاب

میاں محمد ندیم ہفتہ 12 ستمبر 2026 01:06

حافظ نعیم الرحمان نے 20 ستمبر کو اسلام آباد کی طرف مار چ کا اعلان کردیا

گوجرنوالہ(اردوپوائنٹ اخبارتازہ ترین-انٹرنیشنل پریس ایجنسی۔11 ستمبر ۔2026 ) امیر جماعت اسلامی حافظ نعیم الرحمان نے 20 ستمبر کو اسلام آباد کی جانب مارچ کا اعلان کردیا ہے گوجرانوالہ میں جلسے سے خطاب کرتے ہوئے امیر جماعت اسلامی نے کہا کہ حکومت ہماری ٹیم سے مسلسل مہلت مانگ رہی ہے آج پاکستان کے مسائل پر کوئی بولنے والا نہیں ہے، عوام کے آج کے حالات کا ذمہ دار چھوٹا سا طبقہ ہے.

حافظ نعیم نے خطاب میں کہا کہ کہتے ہیں عالمی مارکیٹ کے باعث پیٹرول کی قیمتیں بڑھی ہیں، بتائیں لیوی اور بھاری ٹیکسز کیوں ہیں؟امیر جماعت اسلامی نے کہا کہ یہ مقامی آئل کی قیمت بھی درآمدی آئل کے برابرلیوی اور ٹیکس وصول کرتے ہیں. انہوں نے کہا کہ حکومت نے کہا ہم مجبور ہیں، پیٹرول کی قیمتیں کم نہیں کرسکتے، حکومت نے ہماری ٹیم سے مسلسل مہلت مانگ رہی ہے.

امیر جماعت اسلامی نے کہا کہ 20 ستمبر کو اسلام آباد مارچ ہوگا۔

(جاری ہے)

خیال رہے کہ گزشتہ 27 روز سے ملک کے مختلف شہروں میں پیٹرولیم لیوی اور مہنگائی کے خلاف جماعت اسلامی کے دھرنے جاری ہیں جبکہ اسلام آباد میں جماعت اسلامی کی ٹیم وقفے وقفے سے حکومتی مذکراتی ٹیم کے ساتھ مذکرات کررہی ہے. اسلام آبادمیں جاری مذکرات کا آخری دور 10ستمبر کو ہوا تھاجس کے دوران حکومت نے جماعت اسلامی سے مزید تین دن کا وقت مانگ لیاتھا حکومتی وفد نے جماعت اسلامی سے درخواست کی تھی کہ وہ تین دن مزید اسلام آباد کی طرف لانگ مارچ کی کال نہ دے.

حکومتی وفد سے مذاکرات کیلئے جماعت اسلامی کا وفد نائب امیر لیاقت بلوچ کی سربراہی میں جبکہ حکومتی مذاکراتی ٹیم کی قیادت وزیر منصوبہ بندی احسن اقبال نے کی حکومتی ٹیم میں رانا ثناءاللہ، وزیر پیٹرولیم علی پرویز ملک اور بلال اظہر کیانی شامل ہیں. اس سے قبل 7 ستمبر کو نائب امیر جماعت اسلامی لیاقت بلوچ کی سربراہی میں جماعت اسلامی کے وفد نے پیٹرولیم مصنوعات کی قیمتوں سے متعلق حکومت کو تجاویز و سفارشات پیش کی تھیں.