کمشنر گوجرانوالہ کی پسرور میں کھلی کچہری ،شہریوں کی شکایات براہ راست سنیں

جمعرات 24 ستمبر 2026 17:00

سیالکوٹ(اُردو پوائنٹ اخبارتازہ ترین - این این آئی۔ 24 ستمبر2026ء) کمشنر گوجرانوالہ محمد علی نے پسرور میں کھلی کچہری کے دوران شہریوں کی شکایات براہ راست سن کر مسائل کے فوری ازالے کیلئے متعلقہ افیسران کو موقع پر احکامات جاری کئے۔کھلی کچہری میں محکمہ ریونیو، ستھرا پنجاب، پیرا فورس، محکمہ تعلیم، اکانٹس آفس، میونسپل کمیٹی اور دیگر ضلعی محکموں سے متعلق شہریوں نے درخواستیں اور شکایات پیش کیں۔

درخواست گزاروں میں خواتین اور بزرگ شہری بھی شامل تھے۔ کمشنر نے مختلف درخواستوں پر ریونیو افیسران، گرداوروں اور پٹواریوں کو موقع پر طلب کرکے سماعت کی جبکہ ضلعی کونسل، میونسپل کمیٹی، محکمہ تعلیم اور دیگر محکموں سے متعلق درخواستوں پر متعلقہ افسران کو بھی موقع پر بلایا اور فوری کارروائی کی ہدایت کی۔

(جاری ہے)

کمشنر نے کہا کہ عوامی مسائل کا حل اور شہریوں کو ریلیف کی فراہمی حکومت پنجاب کی ترجیحات میں شامل ہے۔

انہوں نے کہا کہ وزیراعلیٰ پنجاب مریم نواز شریف کی ہدایت پر عوامی مسائل کے حل کے لئے کھلی کچہریاں منعقد کی جا رہی ہیں۔ جن کا مقصد شہریوں کو ان کی دہلیز پر ریلیف کی فراہمی اور مسائل کا فوری ازالہ ہے۔انہوں نے افسران کو ہدایت کی کہ شہریوں کی شکایات پر قانون و ضابطے کے مطابق مقررہ طریقہ کار کے تحت فوری کارروائی یقینی بنائی جائے۔ کمشنر نے شہریوں کو ان کے مسائل کے حل کیلئے ہر ممکن تعاون کی یقین دہانی بھی کرائی۔کھلی کچہری میں ایڈیشنل ڈپٹی کمشنر ریونیو عباس ذوالقرنین، ایڈیشنل ڈپٹی کمشنر سوشل سروسز، اسسٹنٹ کمشنر پسرور ثنا شرافت، اسسٹنٹ کمشنر ڈسکہ سعدیہ جعفر، اسسٹنٹ کمشنر سمبڑیال عدنان بشیر سمیت تمام ضلعی محکموں کے افسران نے شرکت کی۔