بجلی کے فی یونٹ استعمال پر 30 روپے سیلز ٹیکس عائد

ایف بی آر نے اسٹیل سیکٹر کے لیے سیلز ٹیکس کی نئی شرحیں مقرر کر دیں‘ باضابطہ نوٹیفکیشن جاری

میاں محمد ندیم بدھ 30 ستمبر 2026 18:21

بجلی کے فی یونٹ استعمال پر 30 روپے سیلز ٹیکس عائد

اسلام آباد(اردوپوا ئنٹ اخبارتازہ ترین-انٹرنیشنل پریس ایجنسی۔30 ستمبر ۔2026 ) ایف بی آر نے سٹیل سیکٹر کے لیے سیلز ٹیکس کی نئی شرحوں کا اعلان کرتے ہوئے کہا بجلی کے فی یونٹ استعمال پر 30 روپے سیلز ٹیکس ادا کرنا ہوگا فیڈرل بورڈ آف ریونیو (ایف بی آر) نے اسٹیل سیکٹر کے لیے سیلز ٹیکس کی نئی شرحیں مقرر کر دی ہیں جس کے لیے ایس آر او 1245 میں ترامیم کا باضابطہ نوٹیفکیشن جاری کر دیا گیا ہے.

(جاری ہے)

درآمدی یا مقامی خام مال سے اسٹیل بار بنانے والے ری رولرز کو بجلی کے فی یونٹ استعمال پر 30 روپے سیلز ٹیکس ادا کرنا ہوگا اس کے علاوہ مقامی ری میلٹیبل اسکریپ استعمال کرنے والے یونٹس پر 20 روپے فی بجلی یونٹ سیلز ٹیکس مقرر کیا گیا ہے جبکہ سابق فاٹا اور پاٹا میں اسٹیل ری رولرز کے لیے بھی سیلز ٹیکس 20 روپے فی یونٹ ہوگا. سابق فاٹا اور پاٹا کے ان یونٹس میں جہاں درآمدی خام مال یا ری میلٹیبل اسکریپ کا استعمال 70 فیصد سے زائد ہوگا، وہاں 5 روپے فی یونٹ ٹیکس عائد ہوگا نئے قائم ہونے والے اور دوبارہ شروع کیے گئے اسٹیل یونٹس کے لیے 5 روپے فی یونٹ رعایتی سیلز ٹیکس کا معیار سہ ماہی درآمدات یا خریداری سے مشروط ہوگا.

سٹیل میلٹرز، کمپوزٹ یونٹس اور ری رولرز کو بجلی کے بلوں کے ذریعے وصول شدہ سیلز ٹیکس کو اپنے آو¿ٹ پٹ سیلز ٹیکس سے ایڈجسٹ کرنے کی اجازت ہو گی ایف بی آر کے پروڈکشن مانیٹرنگ سسٹم سے تصدیق کے بعد ہی کسی اسٹیل مینوفیکچرر کی کیٹیگری تبدیل کی جا سکے گی رپورٹ میں کہاگیا ہے کہ لیز، ملکیت یا کاروبار کی نوعیت تبدیل ہونے کے باوجود اسٹیل کاروبار سے منسلک بجلی کا کنکشن برقرار رہے گا اور اسے تبدیل نہیں کیا جائے گا.