چینی اساتذہ نے نقل روکنے کیلئے طلبا کو کمرہ امتحان میں اخبار اوڑھادیئے

استادوں نے طالب علموں کو دائیں بائیں دیکھنے سے روکنے کے لیے سر پر اخبار پہنائے جسے تنقید کا نشانہ بنایا گیا

جمعرات 5 جنوری 2017 11:29

بیجنگ( اُردو پوائنٹ اخبارآن لائن۔5جنوری۔2017ء ) چین کے ایک اسکول میں اساتذہ نے طالب علموں کو نقل سے روکنے کا کم خرچ اور موٴثر حل پیش کرتے ہوئے ان کے سروں کے عین درمیان بڑے اخبار اوڑھا دیئے۔چین کے صوبے آن ہوئی کے ایک مڈل اسکول کی تصاویر پر سوشل میڈیا پر بحث جاری ہے جس میں درجنوں طالب علموں کے سروں کو دوپٹے کی طرح اخباروں سے ڈھانپا گیا ہے۔

یہ تصاویر جب سے پیپلز ڈیلی آ ن لائن کی ایک حالیہ اشاعت میں شائع ہوئیں تب سے لوگوں کی جانب سے ان پر نکتہ چینی بھی کی جارہی ہے۔یہ واقعہ جس اسکول میں پیش آیا اس کے ترجمان کا کہنا ہے کہ اصل میں اخبارات اوڑھانے کا عمل امتحان کے متعلق نہیں بلکہ یہ اساتذہ اور بچوں کے درمیان ایک کھیل تھا جس کے ذریعے انہیں امتحان کے دباوٴ کی تربیت فراہم کی گئی تھی۔

(جاری ہے)

اسکول کے مطابق تمام طالب علموں نے بخوشی اس میں حصہ لیا تھا۔لیکن ان تصاویر کے بعد عوام کے درمیان ایک بحث چھڑ گئی ہے کہ آیا نقل سے روکنے کا یہ طریقہ درست ہے؟ ایک اطلاع کے مطابق یہ تصاویر امتحان لینے والے ایک استاد نے کھینچ کر پوسٹ کی ہیں۔ تصاویر میں دیکھا جاسکتا ہے کہ بڑے اخبار کے درمیان سوراخ کرکے اسے طالبعلموں کے سر میں پھنسایا گیا ہے اور دائیں بائیں اخبار کی وجہ سے وہ کچھ بھی دیکھنے سے قاصر ہیں۔ایک استاد نے اس پر شدید تنقید کرتے ہوئے کہا ہے کہ یہ طالب علموں کو نقل سے روکنے کا کوئی طریقہ نہیں بلکہ ان کی خوداعتمادی کو نفسیاتی دھچکا پہنچانے کا ایک فضول عمل ہے جب کہ کچھ لوگوں نے اسے چینی طریقہ تعلیم کے لیے شرمناک قرار دیا ہے۔