سیدعمران احمدشاہ کی زیرصدارت قومی اسمبلی کی قائمہ کمیٹی برائے نجکاری کاچھٹااجلاس،پی آئی اے کی نجکاری کے بارے میں فنانشل ایڈوائزری کنسورشئیم کی سفارشات اوروزارت کی طرف سے اٹھائے جانیوالے اقدامات سے آگاہ کیا

بدھ 21 مارچ 2018 23:40

اسلام آباد ۔ (اُردو پوائنٹ اخبار آن لائن۔ بدھ 21 مارچ 2018ء) قومی اسمبلی کی قائمہ کمیٹی برائے نجکاری کاچھٹااجلاس بدھ کو چیئرمین کمیٹی سیدعمران احمدشاہ کی زیرصدارت منعقدہوا۔ اجلاس میں 28 فروری کوکمیٹی کے پانچویں اجلاس کے منٹس کی منظوری دی گئی۔ وزیر نجکاری نی28 فروری کو منعقدہ کمیٹی کے پانچویں اجلاس میں پیش کردہ سفارشات اورتجاویز پرعمل درآمد اورپیش رفت کے بارے میں بریفنگ دی۔

انہوں نے کمیٹی کوپی آئی اے کی نجکاری کے ضمن میں فنانشل ایڈوائزری کنسورشئیم کی سفارشات اوروزارت کی طرف سے اٹھائے جانیوالے اقدامات کے بارے میں بھی آگاہ کیا۔انہوں نے کمیٹی کے اراکین کوپی آئی اے کے لین دین، فارمیشنل ری سٹرکچرنگ ،ڈائیوسمنٹ حکمت عملی، عمل درآمد(فیز ون)، پی آئی اے کے بنیادی آپریشنز میں نجی شعبے کوسہولت کاری کے ضمن میں اقدامات سے بھی آگاہ کیا۔

(جاری ہے)

انہوں نے کمیٹی کوپی آئی اے (کنورژن) ایکٹ مجریہ 2016کے بارے میں بھی آگاہ کیا۔انہوں نے پی آئی اے کے احیاء نوکیلئے منصوبہ کے خدوخال جس میں پی آئی اے میں سرمایہ کاری، ہوٹل، رئیل اسٹیٹ وغیرہ شامل ہیں، پر تفصیلی روشنی ڈالی۔انہوں نے کہاکہ اس ضمن میں ایوی ایشن، انجینئرنگ، لینڈنگ اینڈ ہینڈلنگ، ٹی ای ایس ، ہیلتھ کئیر اورفلائیٹ کچن کے شعبوں کی تخصیص کی گئی ہے۔

انہوں نے تخصیصی عمل میں پی آئی اے کے بنیادی وغیربنیادی ذمہ داریوں اورضمن میں مختلف آپشنز کے بارے میں بھی آگاہ کیا۔وزیرنجکاری نے پی آئی اے کنورژن ایکٹ کے دفعہ 4کے تحت اثاثوں اورذمہ داریوں اورپی آئی اے کے لین دن اور مشیر کی توسیع کے ضمن میں کوششوں کے بارے میں بھی کمیٹی کوآگاہ کیا۔ انہوں نے کمیٹی کو پی آئی اے سی ایل کیلئے انتظامات/احکامات سکیم ، ائیرلائنز بزنس کیلئے اثاثوں کے جائزہ، نجی شعبے سے اظہاردلچسپی کیلئے اشتہار اوردیگر متعلقہ امور کے بارے میں بھی نجکاری بارے کابینہ کمیٹی کے فیصلوں کے بارے میں تفصیلی طورپرآگاہ کیا۔

اجلاس میں بتایا گیا کہ یوٹیلیٹی سٹورزکارپوریشن کی نجکاری فہرست کے دوسرے مرحلے میں ہیں اورفی الوقت کارپوریشن کی نجکاری عملی منصوبہ میں شامل نہیں اسلئے یوٹیلٹی سٹورزکارپوریشن کی نجکاری کے بارے میں بریفنگ ممکن نہیں۔ اجلاس کے شرکاء نے وزارت کی مجموعی کارگردگی اوربریفنگ پر اطمینان کااظہارکیا۔اجلاس میں فیصلہ کیا گیا کہ پاکستان پوسٹ کی نجکاری بارے بریفنگ آئندہ اجلاس میں دی جائیگی۔