ملک میں عام انتخابات ملتوی ہونے کا خدشہ پیدا ہوگیا

اسلام آباد ہائی کورٹ کی جانب سے ملک کے 8 اضلاع کی حلقہ بندیاں کالعدم قرار دینے کے بعد انتخابات کا 25 جولائی کو انعقاد غیر یقینی کا شکار ہوگیا

منگل 29 مئی 2018 20:03

اسلام آباد (اُردو پوائنٹ اخبار آن لائن۔ منگل 29 مئی 2018ء) ملک میں عام انتخابات ملتوی ہونے کا خدشہ پیدا ہوگیا ہے۔ اسلام آباد ہائی کورٹ کی جانب سے ملک کے 8 اضلاع کی حلقہ بندیاں کالعدم قرار دینے کے بعد انتخابات کا 25 جولائی کو انعقاد غیر یقینی کا شکار ہوگیا ہے۔ تفصیلات کے مطابق اسلام آباد ہائیکورٹ نے ملک بھر کے 8 اضلاع کی حلقہ بندیوں کو کالعدم قرار دیتے ہوئے الیکشن کمیشن پاکستان ( ای سی پی ) کو از سر نو قواعد کے مطابق ان اضلاع میں حلقہ بندیاں کرنے کا حکم دے دیا ہے۔

منگل کو اسلام اذباد ہائیکورٹ میں جسٹس عامر فاروق نے حلقہ بندیوں کے خلاف 40 سے زائد درخواستوں پر فیصلہ سنایا۔ عدالت کی جانب سے جن اضلاع کی حلقہ بندیاں کالعدم قرار دی گئی، ان میں بہاولپور، رحیم یار خان، جھنگ، جہلم، چکوال، ٹوبہ ٹیک سنگھ، لوئر دیر اور بٹگرام شامل ہیں۔

(جاری ہے)

عدالت نے اپنے فیصلے میں کہا کہ نئی حلقہ بندیاں کرتے ہوئے ہر نشست پر آبادی کا تناسب مد نظر رکھا جائے۔

خیال رہے کہ اسلام آباد ہائیکورٹ میں حلقہ بندیوں کے خلاف 108 درخواستیں زیر سماعت ہیں۔ ان درخواستوں میں سے صرف 40 فیصد کا فیصلہ سنایا گیا ہے۔ واضح رہے کہ ای سی پی کی جانب سے 5 مارچ کو نئی حلقہ بندیاں متعارف کرائیں گئیں تھی، جس پر پارلیمانی کمیٹی سمیت مختلف سیاسی جماعتوں نے اپنے تحفظات کا اظہار کیا تھا تاہم الیکشن کمیشن نے پارلیمانی کمیٹی کو بذریعہ مراسلہ آگاہ کیا تھا کہ وہ حلقہ بندیوں کے معاملے میں مداخلت سے گریز کریں۔

اس مراسلے پر پاکستان تحریک انصاف کے رہنما ڈاکٹر عارف علوی نے کہا تھا کہ ہم ای سی پی کو صرف مشورے کے ذریعے حلقہ بندیوں کے نقائض بتانا چاہتے ہیں تاکہ ای سی پی کا کام مزید آسان ہوکیا اس معاملے پر بھی سپریم کورٹ جائیں۔پاکستان مسلم لیگ (ن) کے رہنما صاحبزادہ نذیر سلطان نے کہا تھا کہ الیکشن کمیشن اپنے ہی قوانین کے منافی کام کررہی ہے، جس نے جھنگ میں ان کے حلقے این اے 90 کو ‘برباد’ کردیا۔

اسی طرح پاکستان پیپلزپارٹی (پی پی پی) کے رہنما نوید قمر نے کہا تھا کہ یہ حقیقت ہے کہ پارلیمنٹرینز ای سی پی کو ہدایت جاری نہیں کر سکتے لیکن بطور اسٹیک ہولڈرز ہم رائے یا سفارشات تو پیش کرسکتے ہیں تاہم ای سی پی فیصلہ کرے کہ ان سفارشات کو قابل غور سمجھا جائے یا نہیں۔جماعتِ اسلامی کے صاحبزادہ طارق اللہ نے احتجاج کیا تھا کہ الیکشن کمیشن نے لوئر دیر میں ان کے حلقے کو بھی تبدیل کردیا۔

اب ان اعتراضات کے بعد اسلام آباد ہائیکورٹ نے اپنا فیصلہ سنا دیا ہے۔ اسلام آباد ہائیکورٹ کے اس فیصلے کے بعد انتخابات ملتوی ہونے کا خدشہ پیدا ہوگیا ہے۔ اگر عدالت کی جانب سے مزید حلقوں کی حلقہ بندیاں کالعدم قرار دی جاتی ہیں تو اس صورت میں الیکشن کمیشن صرف 2 ماہ کے اندر دوبارہ حلقہ بندیوں کا کام مکمل نہیں کر پائے گا۔ اس تمام صورتحال میں الیکشن ملتوی یا موخر کر دیے جائیں گے۔