Cycle Chalaain Sehat Banaain - Article No. 2711

آمنہ ماہم
سائیکل چلانا بچپن میں ہر بچے کا شوق ہوتا ہے۔بلکہ اگر کہا جائے کہ یہ صرف بچپن کا نہیں بلکہ ہر عمر کے افراد سائیکل چلا سکتے ہیں تو یہ کہنا غلط نہیں ہو گا۔لیکن کیا آپ کو یہ معلوم ہے کہ سائیکل چلانا صرف ایک کھیل ہی نہیں بلکہ اس سے انسانی صحت پر بھی اثرات مرتب ہوتے ہیں؟سائیکل چلانا ایک ایسی صحت مند سرگرمی ہے جو بچوں اور بڑوں کے لئے یکساں مفید ہے۔اس سے جسمانی تندرستی اور چستی حاصل ہوتی ہے جبکہ بچوں کو مستعد رہنے اور توجہ مرکوز کرنے میں مدد دیتی ہے۔سائیکل ایک سادہ،سستی،قابل اعتماد،صاف ستھری اور ماحولیاتی لحاظ سے پائیدار ذرائع آمد و رفت ہے،جو ماحولیاتی انتظام اور صحت کو فروغ دیتی ہے۔
صحت کیلئے مفید:
سائیکل چلانا جسمانی ورزش کی بہترین قسم ہے جو اچھی صحت یقینی بنانے کے ساتھ ہر عمر کے افراد کے لئے مفید ہے۔

(جاری ہے)

سائیکلنگ انسانی جسم کے مدافعتی نظام کو طاقتور بنانے کے ساتھ مختلف اقسام کے کینسر سے بھی بچاتی ہے۔سائیکل چلانے سے پٹھوں میں لچک اور مضبوطی آتی ہے اور جوڑوں کی حرکت بہتر ہوتی ہے جبکہ اسٹیمنا بھی بڑھتا ہے۔سائیکل چلانا دل کی صحت کے لئے بھی انتہائی مفید ہے اور یہ انسان کو امراض قلب کی مختلف بیماریوں سے بچاتی ہے۔سائیکل چلانے سے دل،خون کی نالیاں اور پھیپھڑے سب مشق کرتے ہیں اور کچھ وقت گزرنے کے ساتھ ہی سانس گہرا ہونے لگتا ہے اور جسم میں حرارت پیدا ہوتی ہے جو کہ صحت کے لئے فائدے مند ہوتا ہے۔سائیکل چلانا جسمانی صحت کے ساتھ ساتھ ذہنی صحت کے لئے بھی نہایت مفید ہے۔اس سے ذہنی دباؤ کم ہوتا ہے جبکہ تشویش اور یاسیت گھٹتی ہے۔اس کے علاوہ ذہنی بیماریوں میں مبتلا ہونے کا امکان بھی کم ہوتا ہے۔سائیکلنگ کے ذریعے بڑی تعداد میں کیلوریز جلائی جا سکتی ہیں۔وزن کم کرنے کے خواہشمند افراد کے لئے یہ ایک بہترین ورزش ہے جو جسم میں موجود زائد کیلوریز جلانے میں معاون ہوتی ہے۔اس سے جسم میں خوراک کی تحلیل کی رفتار بڑھتی اور چربی پگھلتی ہے۔تاہم،وزن کم کرنے کے لئے سائیکل چلانے کے ساتھ ساتھ مناسب غذا کا حصول بھی ضروری ہے۔تحقیق کے مطابق ایک گھنٹہ مسلسل سائیکل چلانے سے 300 کے قریب کیلوریز جلائی جا سکتی ہیں۔ایک دوسری تحقیق سے معلوم ہوا کہ اگر روزانہ آدھا گھنٹہ سائیکل چلائی جائے تو ایک سال میں پانچ کلو چربی کم کی جا سکتی ہے۔ہر عمر میں،جسمانی طور پر متحرک رہنے کے فوائد کہیں زیادہ ہوتے ہیں۔ہالینڈ کی یونیورسٹی آف یوٹریچٹ میں کی گئی ایک تحقیق میں بتایا گیا تھا کہ سائیکل چلانے والے دیگر افراد کے مقابلے میں نہ صرف صحت مند ہوتے ہیں بلکہ ان سے لمبی عمر بھی پاتے ہیں۔
سائیکلنگ کا رجحان:
موجودہ وقت میں ادھیڑ عمر کے جانے کتنے افراد ہوں گے جنہوں نے بچپن میں اپنی یا دوست کی سائیکل یا پھر کرایہ پر حاصل کر کے چلائی ہو گی۔مگر پھر ٹیکنالوجی کا استعمال عام ہونے سے لوگ زیادہ مصروف ہو گئے ہیں،ان کی زندگیوں میں تیزی آ گئی ہے۔گاڑیوں اور موٹر سائیکل بڑی تعداد میں دستیاب ہونے سے سائیکل کا استعمال انتہائی کم ہو گیا ہے۔دور حاضر میں نوعمر بچے بھی سائیکل کی جگہ موٹر سائیکل چلاتے نظر آتے ہیں جس میں کافی حد تک قصور والدین کا ہے جو اپنے بچوں کی سرگرمیوں پر نظر نہیں رکھتے اور افسوس یہ ہے کہ کچھ والدین تو ایسے بھی ہیں جو خود ہی اپنے بچوں کو نوعمری میں ہی موٹر سائیکل چلانا سکھاتے ہیں۔حوصلہ افزاء بات یہ ہے کہ حال ہی میں کچھ نوجوانوں کو شہر کی سڑکوں پر سائیکلنگ کرتے دیکھا جا سکتا ہے جس سے امید کی جا سکتی ہے کہ انھیں دیکھ کر نوجوان اور بچوں میں سائیکلنگ کا شوق پیدا ہو گا۔
بچوں کو سائیکلنگ کروائیں:
آپ اپنے بچوں کو کسی ایسے مقام پر لے جائیں جہاں وہ باآسانی سائیکل چلا سکیں۔آپ انھیں قوائد و ضوابط اور حفاظتی امور سے آگاہ کریں جن میں ہیلمٹ پہننا شامل ہے۔شام کے وقت کسی پارک لے جا کر بچوں کو سائیکلنگ کروائی جائے جس سے نہ صرف ان کی جسمانی ورزش ہو گی بلکہ وہ درختوں کے بیچ ماحولیاتی آلودگی سے بھی محفوظ رہیں گے۔آپ خود بھی بچوں کی رہنمائی کے لئے سائیکلنگ کر سکتے ہیں،بچے والدین کو سائیکل چلاتا دیکھیں گے تو وہ بھی ایسا ہی کرنے کی کوشش کریں گے۔اگر ہفتے میں دو سے چار گھنٹے سائیکل چلانے کے لئے نکال لئے جائیں تو ہماری صحت میں خاطر خواہ بہتری آ سکتی ہے۔