Teeraki Se Zehni O Jismani Tandrusti - Article No. 2547

دنیا بھر میں کووڈ۔19 جیسے وبائی مرض نے ہمیں یہ باور کرایا ہے کہ ذہنی اور جسمانی طور پر صحت مند ہونا کتنا ضروری ہے۔صحت مند زندگی گزارنے کے لئے غذائیت سے بھرپور غذا کے ساتھ ساتھ جسمانی سرگرمیوں کا ہونا بھی ضروری ہے۔جسمانی سرگرمیوں میں جہاں مختلف قسم کی ورزشیں کی جاتی ہیں،وہیں تیراکی (سوئمنگ) بھی ایک بہترین ورزش سمجھی جاتی ہے۔اسے پیراکی بھی کہتے ہیں،کیونکہ انسان اپنے پیر پیچھے دھکیلتا ہے،یعنی پیروں کی مدد سے تیرتا ہے۔
تیراکی نہ صرف تفریح سے بھرپور کھیل ہے،بلکہ اس میں پورے جسم کی ورزش ہو جاتی ہے۔ماہرین کے مطابق صحت مند اور چاق چوبند رہنے کے لئے تیراکی سے اچھی کوئی ورزش نہیں۔تیراکی اعصاب کو مضبوط کرنے میں مدد کرتی ہے۔ایک تحقیق کے مطابق تیراکی ذہنی تناؤ کم کرنے میں معاونت کر سکتی ہے۔

(جاری ہے)

ہفتے میں دو سے تین روز کی تیراکی انسان کو صحت مند اور تندرست و توانا رکھنے کے لئے ضروری ہے۔
عام طور پر گرمیوں میں تمام لوگ نہروں،تالابوں،جھیلوں،دریاؤں یا سمندر کا رُخ کرتے ہیں اور خوب لطف اُٹھاتے ہیں،اسی لئے گرمیوں میں سمندر اور سوئمنگ پولز پر لوگوں کا رش ہوتا ہے۔اس کے علاوہ اگر خدانخواستہ کبھی پانی کی آفات کا سامنا کرنا پڑ جائے تو انسان اپنا اور دوسروں کا تحفظ کرنے کے قابل ہوتا ہے۔
اگر کسی کو تیراکی آتی بھی ہو تو پہلی بار تیراکی کا مظاہرہ کرنے سے قبل اُسے اپنے سپروائزر کی موجودگی میں پانی میں غوطہ لگانا چاہیے۔آج کل چونکہ بچوں کی چھٹیاں ہیں تو انھیں بھی تیراکی سکھائی جائے،کیونکہ اس کے ذریعے ان کی تیزی سے نشوونما ہوتی ہے۔
بچوں میں اگر ایک بار تیراکی کا شوق پیدا ہو گیا تو وہ خود ہی اسے سیکھنے کی جانب مائل ہو جائیں گے۔اس مقصد کے لئے آپ انھیں سوئمنگ کلاسز بھی جوائن کروا سکتے ہیں۔تیراکی سے نہ صرف بچوں کی جسمانی صحت اچھی رہے گی،بلکہ وہ وقت کو درست طریقے سے استعمال کرنا بھی سیکھیں گے۔تیراکی کے بہت سے فوائد ہیں،خاص طور پر بچوں کے لئے یہ جسمانی ورزش بہت فائدہ مند ہے۔
تیراکی کرنے سے انسان کا جسم متناسب ہو جاتا ہے۔تحقیق سے یہ بات ثابت ہو چکی ہے کہ تیراکی کرنے سے جسم میں موجود حرارے (کیلوریز) کم ہو جاتے ہیں اور یوں وزن پر قابو پایا جا سکتا ہے۔سینے کے بل تیراکی کرنے سے جسم کے 60 حرارے،پشت کے بل 80 حرارے،آزادانہ انداز سے 100 حرارے اور دونوں ہاتھ ایک ساتھ آگے بڑھا کر تیراکی کرنے سے 150 حرارے کم ہو سکتے ہیں۔
خود اعتمادی کا حصول
تیراکی میں ہر اعضا کی حرکت کے ساتھ انسان سیکھتا ہے اور اعتماد حاصل کرتا چلا جاتا ہے،اسے ہر مرحلے کی کامیابی کا احساس ہوتا ہے۔ایک تحقیق سے یہ بات بھی سامنے آئی ہے کہ تیراکی کرنے سے انسان کے اندر خود اعتمادی آ جاتی ہے۔تیراکی سیکھتے ہوئے انسان اپنے اہداف مقرر کرتا ہے،جس سے اسے زندگی کو صحیح ڈھنگ سے گزارنے میں مدد ملتی ہے اور وہ اہداف کے حصول کے لئے اپنی توانائیاں بچا کر رکھتا ہے۔تیراکی سیکھنے کے لئے انسان جب خود کو وقف کرتا ہے اور ترتیب سے مشقیں پوری کرتا ہے تو یہی نظم و ضبط زندگی میں اس کے کام آتا ہے۔