Keel O Muhase - Article No. 2868

حکیم راحت نسیم سوہدروی
چہرے پر کیل و مہاسے نکل آئیں، تو نہ صرف چہرہ بدنما دکھائی دیتا ہے، بلکہ بعض کیسز میں یہ تکلیف احساسِ کمتری کا بھی سبب بنتا ہے، کیونکہ چہرہ ہی حُسن و صحت ظاہر کرتا ہے۔عام طور پر بلوغت کی عمر میں چہرے یا جسم کے کسی بھی حصے میں کیل مہاسے نمودار ہونے لگتے ہیں۔زیادہ تر کیسز میں تیس سال کی عمر میں نکلنا بند ہو جاتے ہیں، لیکن بعض اوقات تیس سال کی عمر کے بعد بھی یہ سلسلہ جاری رہتا ہے۔
مشاہدے میں ہے کہ عموماً کیل مہاسوں کو یہ سوچ کر نظر انداز کر دیا جاتا ہے کہ وقت آنے پر ازخود ہی ختم ہو جائیں گے۔جو بالکل درست نہیں۔دراصل بروقت علاج سے چہرے کو بدنما ہونے سے بچایا جا سکتا ہے۔کیل مہاسے کیوں ہوتے ہیں، تو یاد رکھیے، اس کے بے شمار اسباب ہیں۔

(جاری ہے)

مثلاً روغنی غذائیں، ہارمونز کی تبدیلیاں، قبض، ماہانہ ایام، ذہنی دباؤ، بعض ادویہ، گرد و غبار، چاکلیٹ، بعض کیمیائی عناصر، کاربوہائیڈریٹس سے بھرپور غذائیں، تمباکو نوشی، سفید ڈبل روٹی، کیک، کولڈ ڈرنکس، غیر معیاری کاسمیٹکس، ٹالکم پاؤڈر، صابن، فیس واش، لوشن اور کریم کا استعمال زیادہ مرطوب آب و ہوا والے علاقے اور ایسے امراض جو ہارمونز میں عدم توازن کا باعث بنتے ہیں۔

مطب کے مشاہدات کے مطابق کیل مہاسوں سے نجات کے لئے چند روز تک صرف پھلوں پر گزارہ کیا جائے، تاکہ جسم سے فاسد مادے خارج ہو جائیں۔نیز، گرم تاثیر والی اشیاء مثلاً انڈے، مچھلی، تیز مرچ مصالحے، مرغن غذائیں، ثقیل، تلی ہوئی اشیاء، اور خشک میوہ جات وغیرہ کم سے کم استعمال کریں۔اپنے غذائی شیڈول میں سبزیوں اور پھلوں کا استعمال بڑھا دیا جائے۔پانی زیادہ سے زیادہ پئیں۔
ایک پتیلی میں آدھا گلاس پانی لے کر اس میں چھے گرام گل منڈی ڈال کر اُبال لیں۔پھر اسے چھان کر اس میں ایک چمچ شہد ملا کر کے پی لیں۔اس کے علاوہ صبح و شام معجون مصفی خاص ہمدرد چھے چھے گرام ہمراہ عرقِ منڈی آدھا آدھا کپ، جبکہ رات سونے سے قبل ہمدرد کی صافی دو چائے کے چمچ تازہ پانی ملا کر دو تین ہفتے تک مسلسل استعمال کریں۔صافی خون صفا شربت ہے۔