Anaar Khana Maat Bholiye - Article No. 729

انار کھانا مت بھُولیے - تحریر نمبر 729

اگر آپ ڈائٹنگ کر رہے ہوں تو انار کھائیے اس لئے کہ اس میں ریشہ ہوتا ہے اور اسے کھانے سے آپ کی بھوک کم ہو جاتی ہے۔یہ آپ کے ہضم وجذب کے نظام کو درست رکھتا ہے ۔ ڈائٹنگ کرنے والوں کے لیے ایک موثر غذاہے

بدھ 10 جون 2015

صباگل حسن :
یہ انار کا موسم ہے۔ ہم سب انار کے فائدوں سے واقف ہیں۔ قدیم زمانے میں بھی یونانی اور مصری باشندے انار کو صحت بخشی کی علامت سمجھتے تھے۔ حالیہ تحقیق کے مطابق انار سے درج ذیل فائدے حاصل کیے جا سکتے ہیں:
وزن کم کرتا ہے
انار کے بیجوں میں نشاستہ ہوتا ہے۔ اس کے 100 گرام بیجوں میں83حرارے (کیلوریز) ہوتے ہیں۔

انار توانائی بخش پھل ہے لہٰذا اسے کھانے کے بعد آپ فرحت محسوس کرتے اور سارا دن چاق و چوبند رہتے ہیں۔
اگر آپ ڈائٹنگ کر رہے ہوں تو انار کھائیے اس لئے کہ اس میں ریشہ ہوتا ہے اور اسے کھانے سے آپ کی بھوک کم ہو جاتی ہے۔یہ آپ کے ہضم وجذب کے نظام کو درست رکھتا ہے ۔ ڈائٹنگ کرنے والوں کے لیے ایک موثر غذاہے۔
قوت مدافعت بڑھاتا اور گرتے بالوں کو روکتا ہے
حیاتین ج(وٹامن سی) سے قوتِ مدافعت میں اضافہ ہوتا ہے انار میں سیب اور دوسرے پھلوں کی نسبت چار گنی زیادہ حیاتین ج ہوتی ہے۔

(جاری ہے)

اس کے علاوہ حیاتین ھ(وٹامن ای) کی مناسب مقدار بھی ہوتی ہے۔
انار کا اٹھ اونس رس روزانہ پینے سے چہرے کے مہاسے ختم ہو جاتے ہیں اور چہرہ چمکنے لگتا ہے۔ یہ موسمِ سرما میں آپ کی جلد کو نرم وملائم رکھتا اور پانی کی کمی کو پورا کرتا ہے۔
انار سر کے بالوں کی جڑوں کو مضبوط کرتا اور انھیں گرنے سے روکتا ہے۔ اسی بنا پر لوگ انار کاتیل سرمیں اور جلد پرلگاتے ہیں۔

دافع امراض ہے
انار کے رس میں سبز چاے سے زیادہ مانع تکسید اجزا (ANTIOXDANTS) ہوتے ہیں اس لیے یہ بہت سے امراض کو ختم کرتا ہے۔ اگر اس کا رس پابندی سے پیا جائے تو قولون (بڑی آنت) سینے اور غدہ قدامیہ کے سرطان کے خلاف قوتِ مدافعت پیدا ہوتی ہے۔
انار کے چھلکے کے سفوف سے جِلد کے سرطان میں کمی آجاتی ہے۔ چنانچہ سرطان کے ماہرین انار کے چھلکے کے سفوف کو پابندی سے کھانے کی ترغیب دیتے ہیں۔

اس کے علاوہ انار میں فولاد ،پوٹاشیم اور مینگنیز بھی ہوتے ہیں۔ جن سے صحت اچھی ہو جاتی ہے انار حاملہ خواتین کے لئے فائدے مندہے۔ حمل کے دوران یہ نہ صرف خون میں سرخ زرات کی کمی کو دور کرتا ہے بلکہ زچگی کے دوران تشنج پر قابو رکھتا ہے۔
دل کی حفاظت کرتا ہے
انار میں شامل اجزاسے بلڈ پریشر اور کولیسٹرول میں کمی آجاتی ہے۔ انار شریانوں کو صاف رکھتا ہے اور خون میں تھکّے نہیں پڑنے دیتا۔ چنانچہ اس کا رس پینے سے دل کو تقویت پہنچتی ہے۔
انار دانوں کو سلاد کے ساتھ شامل کیجیے۔ اس کا رس پییں یامیٹھی ڈش بناتے وقت انار کے دانے اس میں شامل کر لیجیے مگر کسی بھی طریقے سے اسے ضرور کھائیے ۔ یہ صحت کے لیے فائدے مند پھل ہے۔