Coconut - Qudrat Ka Ata Karda Sehat Bakhsh Phal - Article No. 2986

محمد فاروق دانش
ناریل اپنے فوائد کے باعث پوری دنیا میں پسند کیا جاتا ہے۔ناریل کے درخت کو سنسکرت میں ”کلپا ورکشا“ کہتے ہیں، جس کے لغوی معنی ہیں:”ایسا درخت جو زندگی کی تمام ضروریات کو پورا کرتا ہے۔“ ناریل صحت بخش قدرتی اجزاء سے لبریز ہے، اسے غذا کے طور پر بھی کھایا جا سکتا ہے۔اس میں موجود پانی صحت کے لئے مفید ہے۔مدافعتی نظام میں بہتری لاتا ہے۔یہ اینٹی بیکٹیریل اور اینٹی پیراسائٹک ہے۔سوزش کم کرنے، بدہضمی اور تیزابیت کو روکنے میں فائدہ مند ہے۔غذائیت سے بھرپور ناریل کھانے سے جلد بھوک نہیں لگتی۔ناریل کا استعمال لبلبے پر دباؤ کم کر کے ذیابیطس میں مبتلا ہونے کا خطرہ بھی کم کرتا ہے۔نظامِ ہاضمہ کو بہتر کر کے قبض جیسے مرض سے تحفظ فراہم کرتا ہے۔

(جاری ہے)

اگر ناریل روزانہ کھائیں، تو ہڈیوں کی صحت بہتر ہوتی ہے۔یہ ہڈیوں کے بھربھرے پن کا خطرہ کم کرتا ہے۔کچا ناریل کھانے سے خون میں ایل ڈی ایل یا نقصان دہ کولیسٹرول کی مقدار کم ہوتی ہے۔
ناریل کے پانی میں الیکٹرولائٹس پائے جاتے ہیں، جو جسم کو ہائیڈریٹ کرتے ہیں۔یہ پانی کئی غذائی اجزاء جیسے کیلشیم، میگنیشیم، پوٹاشیم اور فاسفورس سے بھی بھرپور ہے۔ناریل کا پانی ہڈیوں اور دانتوں کی صحت بہتر بنانے میں بھی مدد دیتا ہے۔اس کے پانی میں موجود تھیامن یا وٹامن بی ون آنکھوں کی صحت بہتر کرنے اور گلوکوما کو روکنے میں مدد کرتا ہے۔یہ دماغی صحت کے لئے بھی بہت فائدہ مند ہے۔نیز، ناریل کا پانی افسردگی، تناؤ کم کرتا ہے۔یادداشت بہتر بناتا ہے۔اس کا پانی منہ میں موجود بیکٹیریا کا خاتمہ کرتا ہے، جس سے سانس میں بو کا مسئلہ کم ہوتا ہے۔
مختلف تحقیقات نے ثابت کیا ہے کہ ناریل کے تیل کے استعمال سے نہ صرف جسمانی توانائی اور صحت مند کولیسٹرول بڑھتا ہے، بلکہ یہ خون میں شوگر کی سطح کو بھی متناسب رکھتا ہے۔ناریل کے تیل میں قدرتی طور پر اینٹی بیکٹیریا، اینٹی ٹاکسائیڈ، اینٹی فنگل جیسے اجزاء شامل ہیں۔اس کے تیل میں پکا ہوا کھانا کھانے سے لبلبے اور جگر پر تناؤ کم ہو جاتا ہے۔یہ معدے کی صحت کو بہتر بناتا ہے۔جوڑوں کو چکنائی فراہم کرتا ہے اور اسی طرح یہ گٹھیا اور جوڑوں کے دیگر مسائل کا علاج کرنے کا ایک بہترین ذریعہ ہے۔سر میں ناریل کے تیل کی مالش بالوں کی خشکی اور سر کی جلدی خارش کو ختم کر دیتی ہے۔ناریل کے تیل کو جھریوں پر لگانے سے نہ صرف ان میں کمی آتی ہے، بلکہ جلد تر و تازہ ہو جاتی ہے۔