Sabz Rang Ke Saib Diabetes Ke Marizoon Ke Liye Mufeed - Article No. 2584

ایک نئی تحقیق کے مطابق سبز رنگ کے سیب ذیابیطس کے مریضوں کے لئے بہت مفید ہیں،البتہ انھیں سرخ رنگ کے سیب کھانے سے احتراز کرنا چاہیے،کیونکہ یہ اُن کے لئے نقصان دہ ثابت ہو سکتے ہیں۔سیب ایک مانع تکسید (Antioxidant) پھل ہے۔اس میں موجود مانع تکسید اجزاء مختلف قسم کے سرطانوں سے محفوظ رکھتے ہیں۔سیب میں ریشے اور پانی کی مقدار زیادہ ہوتی ہے۔اس میں موجود پولی فینالز (Polyphenols) جیسے مفیدِ صحت اجزاء نہ صرف فربہی دور کرنے میں مدد دیتے ہیں،بلکہ ہائی بلڈ پریشر کو معمول پر لا کر فالج جیسی بیماری سے بھی بچاتے ہیں،اسی طرح اس میں پائے جانے والے فلیوونائڈز (Flavonoids) بھی فالج کے خطرے کو کم کر دیتے ہیں۔
سیب کھانے سے ذیابیطس قسم۔2 کا خطرہ کم بھی ہو سکتا ہے۔سیب جگر کے لئے بھی بہت فائدہ مند پھل ہے۔

(جاری ہے)

یہ جگر سے زہریلے مادوں کو خارج کرنے کی صلاحیت رکھتا ہے،اس لئے ہمیں اپنی روزانہ کی غذاؤں میں دوسرے پھلوں کے ساتھ سیب کو بھی ضرور شامل کرنا چاہیے،تاکہ ہمارا جگر صحت مند رہے۔اس کے علاوہ سیب میں ایک صحت بخش جزو پیکٹن (Pectin) بھی پایا جاتا ہے،جو بڑی آنت میں موجود مفیدِ صحت بیکٹیریا کی نشوونما کرتا ہے،جس سے بڑی آنت امراض سے محفوظ رہتی ہے۔سیب کھانے سے قوتِ مدافعت میں بھی اضافہ ہوتا ہے۔سیب بہت زود ہضم پھل ہے،اسے روزانہ کھانا چاہیے۔