ایکنک نے راولپنڈی میں200بستروں کے جدید ترین زچہ و بچہ مرکزصحت کے قیام سمیت متعدد منصوبوں کی منظوری دیدی

اسلام آباد (اُردو پوائنٹ اخبارتازہ ترین - این این آئی۔ 07 مارچ2018ء)قومی اقتصادی کونسل کی انتظامی کمیٹی (ایکنک ) نے راولپنڈی میں200بستروں کے جدید ترین زچہ و بچہ مرکزصحت کے قیام سمیت متعددمنصوبوں کی منظوری دیدی ۔قومی اقتصادی کونسل کی انتظامی کمیٹی (ایکنک )کا اجلاس بدھ کو وزیراعظم شاہدخاقان عباسی کی زیر صدارت وزیراعظم آفس میں منعقد ہوا۔ ایکنک نے 11638ملین روپے کی مجموعی لاگت سے این ٹی ڈی سی کے ٹیلی کمیونیکیشن اور ایس سی اے ڈی اے نظام کی بہتری و توسیع کی منظوری دی۔

راولپنڈی میں5301.41 ملین روپے کی لاگت سے نظرثانی شدہ اوبسٹیٹریکس اور گائنا کالوجی کے لئے 200بستروں کے سینٹر فار ایکسیلینس کے قیام کی منظوری بھی دی گئی۔ایکنک نے آئی ایف اے ڈی کی معاونت سے 7565.78ملین روپے کی مجموعی لاگت سے (نظر ثانی شدہ II-) جنوبی پنجاب تخفیف غربت منصوبے کی بھی منظوری دی اس منصوبے کا مقصد جنوبی پنجاب کے عوام کیلئے خواتین پر توجہ مرکوز کرتے ہوئے گھریلو آمدن میں اضافہ ‘ روزگار کے مواقع فراہم کرنا ‘ پیشہ ورانہ و کاروباری تربیت کی فراہمی کے ساتھ ساتھ کم لاگت کے مکانات اور کمیونٹی انفراسٹرکچر کی ترقی ہے۔

(جاری ہے)

اجلاس نے 4874.225 ملین روپے کی لاگت سے ڈیرہ غازی خان کے 18.9کلو میٹر کے نادرن بائی پاس کی تعمیر کی بھی منظوری دی۔ ایکنک نے 16755.5 ملین روپے کی لاگت سے 153کلو میٹر طویل چترال ۔بومی ۔ مستوج ۔ شندور روڈ کی بہتری اور توسیعی کی بھی منظوری دی۔اجلاس نے 13012.13ملین روپے کی مجموعی لاگت سے سہالہ ریلوے پاس ‘ سہالہ بائی پاس اور کہوٹہ بائی پاس پر 4لین کے پل سمیت 28.4کلو میٹر کے راولپنڈی ۔

کہوٹہ روڈ کو دو رویہ کرنے کیلئے تعمیر ‘ اراضی کے حصول ‘ متاثرہ املاک کی تلافی اور یوٹیلٹیز کو ازسرنو کو متعین کرنے کی بھی منظوری دی۔ بلوچستان کو پنجاب سے منسلک کرنے کے مقصد کے حامل 8379.075 ملین روپے کی لاگت سے زیارت موڑ۔ کچھ ۔ہرنائی روڈ(107.2کلو میٹر) اور ہرنائی۔ سنجاوی روڈ (55.1کلو میٹر) کی بھی منظوری دی۔ایکنک نے 12606.62ملین روپے کی لاگت سے 120.12کلو میٹر طویل کے کے ایچ فیز I سی پیک نظر ثانی شدہ (حویلیاں۔ تھاہ کوٹ( منصوبے کے لئے اراضی کے حصول ‘ متاثرہ املاک کی تلافی اور یوٹیلیٹیز کو دوسری جگہ منتقل کرنے کی بھی منظوری دی۔