ضلع ناظم کوہاٹ کا چورلکی رورل ہیلتھ سنٹر پر رات گئے چھاپہ ،ڈاکٹر اورچوکیدار سمیت تمام طبی عملہ کی عدم موجودگی پر برہمی کا اظہار ، طبی مرکز کو تالہ لگا دیا

کوہاٹ(اُردو پوائنٹ اخبارتازہ ترین - این این آئی۔ 16 فروری2019ء) ضلع ناظم کوہاٹ محمدنسیم آفریدی نے دوراٴْفتادہ علاقے چورلکی میں رورل ہیلتھ سنٹر پر رات گئے چھاپہ میں ڈاکٹر اورچوکیدار سمیت تمام طبی عملہ کی عدم موجودگی اور گاؤں میں ایک محفل موسیقی میں شریک ہونے پرشدید برہم ہوکرسرکاری طبی مرکز کو تالہ لگادیا اور سیکرٹری محکمہ صحت سے کہا کہ وہ کوہاٹ میں بنیادی صحت کے تمام مراکز بند کر کے ڈاکٹروں سمیت تمام عملے کو گھربیٹھے تنخواہ اداکیاکریں تاکہ عوام ان مراکز صحت کی بڑی بڑی عمارتوں پر دھوکہ نہ کھائیںکیونکہ ان میں ڈاکٹراپنی ڈیوٹی سرانجام نہیں دے رہے۔

تفصیلات کے مطابق جمعہ اور ہفتہ کی درمیانی شب ضلع ناظم کوہاٹ محمدنسیم آفریدی نے کوہاٹ سے ڈیڑھ گھنٹہ کی طویل مسافت پر واقع دوراٴْفتادہ پہاڑی علاقہ چورلکی میں رورل ہیلتھ سنٹر(آرایچ سی) پر چھاپہ مارا جہاں سنٹر میں ڈاکٹراور چوکیدار سمیت تمام طبی عملہ موجودنہیں تھا بلکہ قریبی گاؤں میں شادی کی تقریب میں ہونے والی محفل موسیقی میں موجودتھا۔

(جاری ہے)

ضلع ناظم نے سنٹر میں عملہ کی عدم موجودگی پر شدید برہم ہوکر آرایچ سی کو تالہ لگادیا اور بعدازاں محفل موسیقی بھی گئے جہاں اٴْنہوں نے مبینہ طورپرعیاش ڈاکٹرسمیت تمام عملے کو دیکھا جو تقریب میں موجودخواجہ سراؤں کے ڈانس اور گانوں سے محظوظ ہورہے تھے۔اس موقع پر اپنے ویڈیوبیان میں ضلع ناظم نے کوہاٹ کے عوام سے کہا کہ وہ ضلع بھر میں صحت کے بنیادی مراکزکی شاندار عمارتوں پر دھوکہ نہ کھائیں جہاں عمارتیں موجودہیں لیکن ڈیوٹی دینے والا طبی عملہ موجودنہیں ۔

نسیم آفریدی نے سیکرٹی ہیلتھ خیبرپختونخواہ سے کہا کہ وہ تمام مراکز بندکرکے ڈاکٹروں سمیت تمام عملے کو گھربیٹھے تنخواہ اداکیا کریں۔اٴْنہوں نے افسوس کا اظہار کیا کہ وہ پانچ بار سیکرٹری ہیلتھ سے ملے لیکن کوئی شنوائی نہیں ہوئی۔ ضلع ناظم نے کہا کہ جب ڈاکٹروں کے خلاف کاروائی کی سفارش کی جاتی ہے تو وہ بازوؤں پر سیاہ پٹیاں باندھ کر احتجاج پر اٴْترآتے ہیں۔

اٴْنہوں نے کہا کہ جہاں بھی ڈاکٹر نہیں ہوگا وہاں تالہ لگے گا۔ ضلعی ناظم نے الزام لگایا کہ کوہاٹ میں گھربیٹھے تنخواہ لینے والے داکٹروں کو مقامی حکام کی آشیربادحاصل ہے۔ ڈسٹرکٹ ہیلتھ آفیسر سمیت اٴْوپر تک بھتہ دیا جاتا ہے ورنہ ڈیوٹی سے غیرحاضررہنے والوں کے خلاف اب تک پانچ سے زائد مرتبہ شکایات کرنے پر کارروائی ہوجاتی۔