گردے انسانی زندگی کیلئے انتہائی اہمیت کے حامل ، جنرل ہسپتال میں چیک اپ کیلئے صبح 8تا رات 8تک سہولت

لاہور(اُردو پوائنٹ اخبارتازہ ترین - این این آئی۔ 14 مارچ2019ء) گردے انسانی زندگی کیلئے انتہائی اہمیت کے حامل ہیں جس طرح دل بند ہو جائے تو زندگی ختم ہو جاتی ہے ،اسی طرح گردوں کے فیل ہو جانے سے بھی انسان کا جینا ممکن نہیں رہتا ۔ ان خیالات کا اظہار پرنسپل امیر الدین میڈیکل کالج پروفیسر ڈاکٹر محمد طیب نے عالمی یوم گردہ کے موقع پر لاہور جنرل ہسپتال میں منعقدہ آگاہی واک اور سیمینار سے خطاب کرتے ہوئے کیا ۔

تقریب میں پروفیسرسردار فرید ظفر پروفیسر آف یورالوجی ڈاکٹر محمد نذیر ،ہیڈ آف نیفرالوجی ڈاکٹر اورنگزیب افضل ، ایم ایس ڈاکٹر محمود صلاح الدین،ڈائریکٹر ایمرجنسی ڈاکٹر رانا محمد شفیق ،پرنسپل نرسنگ کالج رضیہ بانو ،ڈپٹی نرسنگ سپرٹینڈنٹ میڈم رقیہ ، ڈاکٹرز ،نرسز ، میڈیکل طلبا و طالبات ،پیرا میڈیکس اور مریض و اُن کے لواحقین بڑی تعداد میں شریک تھے ،اس سال کا تھیم - -"گردوں کی صحت، ہر جگہ،ہر کسی کیلئی"مقرر کیا گیا ہے ،واک کے شرکاء نے گردوں کی اہمیت ،مرض کی علامات،پیچیدگیوں ،بچاؤ اور جدید طریقہ علاج پر مبنی بینرز اور پلے کارڈز اٹھا رکھے تھے۔

(جاری ہے)

میڈیا سے گفتگو کرتے ہوئے پروفیسر محمد طیب کا کہنا تھا کہ دنیا بھر میں 800ملین افراد گردوں کے مرض میں مبتلا ہیں ،شہری گردے کے درد،پتھریوں،پراسٹیٹ،یورین کے بہاؤ میں رکاوٹ اور مثانہ کی بیماری کو معمولی سمجھ کر نظر انداز کر دیتے ہیں جو آہستہ آہستہ گردوں کو نقصان پہنچانے کا باعث بنتے ہیں۔پروفیسر سردار فرید ظفر نے کہا کہ عوام میں شعور اجاگر کرنے کیلئے سول سوسائٹی ،میڈیا،علمائے کرام اور طب سے وابستہ افراد کو اسے قومی ذمہ داری سمجھ کربھرپور طریقے سے کردار ادا کرنا ہوگا۔

انہوں نے کہا کہ گردوں کا مرض بچوں اور خواتین میں بھی تیزی سے بڑھ رہا ہے لہذااحتیاطی تدابیر کو عام کرنا چاہیے تاکہ نوجوان نسل اس مہلک بیماری سے محفوظ رہے۔پروفیسر محمد نذیر اور ڈاکٹر اورنگزیب افضل سمیت دیگر مقررین نے گردوں کے امراض کی علامات کے بارے میں بتاتے ہوئے کہا کہ چہرے و پاؤں پر صبح کے وقت زیادہ سوجن ، بھوک نہ لگنا ،پیشاب میں جھاگ ، مثانے میں درد و جلن اور سانس میں تکلیف وغیرہ شامل ہیں جبکہ ذیابیطس اور ہائی بلڈ پریشر بھی گردوں کو ناکارہ بنانے کا سبب بنتے ہیں۔

ایسے مریضوں کو باقاعدگی سے طبی معائنہ کروانا چاہیے،چکنائی والی غذائیں کم استعمال کرنی چاہئیں ۔نیز نوجوان جنسی طاقت کیلئے عطائیوں کے کشتہ جات استعمال نہ کریں ۔میڈیکل سپرنٹنڈنٹ ڈاکٹر محمود صلاح الدین نے بتایا کہ مخیر حضرات کے تعاون سے 6کروڑ روپے کی لاگت سے لاہور جنرل ہسپتال میں یورالوجی ڈیپاڑٹمنٹ کو اپ گریڈ کر دیا گیا اور اب خواتین اور مردوں کیلئے علیحدہ علیحدہ وارڈ مختص ہیں ،اسی طرح صبح8سے شام8بجے تک آؤٹ ڈور کی سہولت بھی موجود ہے ۔ انہوں نے مزید کہا کہ ہیپاٹیائٹس کے مریضوں کیلئے ڈائیلسز کی الگ مشینیں بھی کام کر رہی ہیں لہذا لوگوں کو نیم حکیموں کی بجائے باقاعدہ ہسپتالوں سے رجوع کرنا چاہیے۔