آسٹریلوی ماہرین کا دماغ پر فالج کے اثرات روکنے والے مکڑی کے زہر کی دریافت کا دعوی

سڈنی (اُردو پوائنٹ اخبارتازہ ترین - اے پی پی۔ 15 اپریل2019ء) آسٹریلوی ماہرین نے دعویٰ کیا ہے جزیرہ فریزر پر فنل ویب نامی مکڑی ایک ایسا مادہ خارج کرتی ہیں جس میں شامل عنصر دماغ پر فالج کے اثرات کو روکنے میں اہم کردار ادا کرسکتا ہے۔ رپورٹ کے مطابق فریزر جزیرے کی فنل ویب نامی مکڑی اتنی زہریلی ہے کہ اس کے کاٹنے سے پندرہ منٹ کے اندر موت واقع ہو سکتی ہے۔

لیکن اس کا زہر ایک ایسی دوا کی تیاری میں استعمال ہو سکتا ہے جس سے سٹروک کے باعث ہونے والے دماغی نقصان کو روکا جا سکتا ہے۔ سائنسدان کہتے ہیں کہ اس زہریلے مادے سے دماغ میں ایک ایسے راستے کو بند کیا جا سکتا ہے جو سٹروک کے بعد موت کے امکانات کو بڑی حد تک بڑھا دیتا ہے۔آسٹریلیا کی یونیورسٹی آف کوئینز لینڈ کے ماہرین کے مطابق یہ ایک بڑی پیش رفت ہے جس سے فالج کے مریضوں کو اس وقت تحفظ فراہم کیا جا سکتا ہے جب انہیں ہسپتال لے جایا جا رہا ہوتا ہے۔

(جاری ہے)

ڈاکٹرز کا کہنا ہے کہ فالج کے حملے کے بعد چار سے ساڑھے چار گھنٹے کے اندر مریض کو مناسب دیکھ بھال اور ادویات کی فراہمی ضروری ہوتی ہے۔آسٹریلوی ماہرین کے مطابق اس مکڑی کے زہر سے تیار کی جانے والی دوا فوری طور پر پیرا میڈکس عملہ بھی دے سکتا ہے جس سے سٹروک کے بعد مریض مزید دماغی نقصان سے بچ سکتا ہے۔تحقیقاتی ٹیم کے سربراہ پروفیسر گلین کہتے ہیں کہ سٹروک کے بعد دماغ کے اندر پیدا ہونے والے کیمیائی مادوں کی وجہ سے ایسی صورتحال پیدا ہو جاتی ہے جو موت کا راستہ ہموار کرتی ہے۔

ایسا کیوں ہوتا ہے اس کی وجہ معلوم نہیں اور یوں عصبی خلیے مرنے لگتے ہیں۔ تاہم اب اٴْنہوں نے فریزر آئی لینڈ کے فنل ویب سپائیڈر کا زہر دریافت کیا تو معلوم ہوا کہ اس سے موت کے امکانات میں رکاوٹ آتی ہے اور اس سے عصبی خلیے بھی نہیں مرتے۔ جو خلیے ختم ہو جاتے ہیں ان کا تو کچھ نہیں ہو سکتا لیکن ایک بات یقینی ہے کہ سٹروک کے بعد اگر آٹھ گھنٹوں کے اندر یہ دوا دے دی جائے تو دماغ بڑی حد نقصان سے محفوظ رہتا ہے۔

فریزر آئی لینڈ فنل ویب سپائیڈر آسٹریلیا کی ریاست کوئینز لینڈ ہی میں پائی جاتی ہیں اور یہ جھاڑیوں میں ریت اور زمین کے نیچے رہتی ہیں۔عالمی ادارہ صحت کا کہنا ہے کہ عالمی سطح پر سٹروک موت کی دوسری بنیادی وجہ ہے اور معذوری کا تیسرا بڑا سبب ہے۔ آسٹریلیا میں ایک اندازے کے مطابق ہر سال سٹروک کا سامنا کرنے والوں کی تعداد 56 ہزار ہے۔ ان میں نئے مریض اور وہ افراد بھی شامل ہیں جن پر پہلے بھی فالج کا حملہ ہو چکا ہوتا ہے۔