سینیٹ اورقومی اسمبلی کے اجلاس 2روزکے وقفے کے بعد(کل) دوبارہ شروع ہوں گے، قومی اسمبلی میں احتساب بل 2012ء پیش کئے جانے کاامکان،حکومت بل کی منظوری،اپوزیشن مستردکرانے کیلئے ایڑی چوٹی کازورلگائے گی، اپوزیشن لیڈر کی (ن)لیگی ارکان کو ایوان میں حاضری یقینی بنانے کی ہدایت،احتساب بل کی پارلیمان سے منظوری کی صورت میں فصیح بخاری نیب کی چیئرمین شپ سے عملاً محروم ہو جائینگے

اسلام آباد(اُردو پوائنٹ اخبار تازہ ترین۔آئی این پی۔18نومبر۔2012ء) سینیٹ اورقومی اسمبلی کے اجلاس 2روزکے وقفے کے بعد(کل)پیرکی شام دوبارہ شروع ہوں گے ، قومی اسمبلی میں احتساب بل 2012ء پیش کئے جانے کاامکان،مسلم لیگ(ن) کی جانب سے شدید ہنگامی آرائی متوقع، اپوزیشن لیڈر چوہدری نثار علی خان نے (ن)لیگی ارکان کو ایوان میں اپنی حاضری یقینی بنانے کی ہدایت کردی ، احتساب بل کی پارلیمنٹ سے منظوری کی صورت میں ایڈمرل(ر) فصیح بخاری نیب کی چیئرمین شپ سے عملاً محروم ہو جائیں گے۔

تفصیلات کے مطابق سینیٹ کااجلاس ایوان کے چیئرمین سیدنیئرحسین بخاری جبکہ قومی اسمبلی کااجلاس سپیکرقومی اسمبلی ڈاکٹرفہمیدہ مرزا کی زیرصدارت شروع ہوگا۔قومی اسمبلی میں (کل)حکومت کی جانب سے احتساب بل 2012ء منظوری کیلئے پیش کیاجائے گا اوراس بل کومنظورکرانے کی تمام تیاریاں مکمل کرلی گئی ہیں حکومتی پارٹی کے چیف اور پی پی پی اور اتحادی جماعتوں کے تمام ممبران اسمبلی کو اپنی حاضری یقینی بنانے کی ہدایات جاری کی گئی ہیں جبکہ مسلم لیگ (ن) نے اس بل کی بھرپورمخالفت کرنے کااعلان کررکھاہے اور اپوزیشن لیڈر چوہدری نثار علی خان نے بھی (ن) لیگی ارکان کو ایوان میں اپنی حاضری یقینی اور بل کی بھرپور مزاحمت کرنے کی ہدایت کی ہے تاہم چیئرپرسن کمیٹی برائے قانون و انصاف کی جانب سے احتساب بل کا مسودہ تاحال مسلم لیگ (ن) کے کارکن زاہد حامد کو نہیں مل سکا ۔

(جاری ہے)

ادھر احتساب بل2012ء کی پارلیمنٹ سے منظوری کی صورت میں ایڈمرل(ر) فصیح بخاری نیب کی چیئرمین شپ سے عملاً محروم ہو جائیں گے کیونکہ مجوزہ احتساب بل کے تحت صرف سپریم کورٹ کا ریٹائرڈ جج، سپریم کورٹ کا جج بننے کے اہل فرد یا گریڈ22 کا کوئی ریٹائرڈ آفیسر ہی احتساب بیورو کاچیئرمین بننے کا اہل ہو گا۔ واضح رہے کہ ہفتہ کو چیئرمین نیب فصیح الدین بخاری نے اپنی پریس کانفرنس میں مستعفی نہ ہونے اور کرپشن کے خلاف جنگ جاری رکھنے کا اعلان کیا تاہم قانونی ماہرین کے مطابق ایڈمرل فصیح الدین بخاری گریڈ22 کے آفیسر یا ریٹائرڈ جج یا سپریم کورٹ کا جج بننے کے اہل نہیں اس لئے وہ احتساب بل کی منظوری کی صورت میں احتساب بیورو کے آئندہ چیئرمین مقرر نہیں ہو سکتے۔

دریں اثناء نئے احتساب بل میں ریٹائرڈ جنرلوں اور دیگر افسران کی بطور چیئرمین تقرری روکنے کیلئے(ن) لیگ نے چیئرمین کی اہلیت میں صرف سپریم کورٹ کے ریٹائرڈ جج اور گریڈ22 کے افسران کی شق شامل کروائی ہے اگرگریڈ22 یا اس کے برابر کے الفاظ شامل ہوئے تو ریٹائرڈ فوجی جنرنیلوں کی تقرری کی راہ بھی ہموار ہو سکتی تھی۔