میڈیکل ویسٹ کو ٹھکانے لگانے کا انتظام نہ کرنیوالے پرائیویٹ ہسپتالوں کے مالکان کے خلاف مقدمات درج کرائے جائیں، ڈپٹی کمشنر

ملتان ۔ (اُردو پوائنٹ اخبارتازہ ترین - اے پی پی۔ 04 ستمبر2019ء) ڈپٹی کمشنر عامرخٹک نے کہا ہے کہ ہسپتالوں کا ویسٹ اور فضلہ انسانی صحت کے لیے تباہ کن ہے۔ پرائیویٹ ہسپتالوں کے مالکان اسے ٹھکانے لگانے کی بجائے چند روپوں کی خاطر بیچ دیتے ہیں جو کہ انسانی جانوں کو دائو پہ لگانے کے مترادف ہے۔ پولٹری فارمز کی مری ہوئی مرغیاں اور ویسٹ نہری پانی میں پھینکا جا رہا ہے اور پانی اور ماحول کو آلودہ کیا جارہا ہے۔

ڈپٹی کمشنر نے ہدایت کی ہے کہ میڈیکل ویسٹ کو ٹھکانے لگانے کا انتظام نہ کرنے والے پرائیویٹ ہسپتالوں کے مالکان کے خلاف مقدمات درج کرائے جائیں اور حکم دیا ہے کہ آلودگی کا باعث بننے والے پولٹری فارمز سیل کر دئے جائیں۔ وہ سرکٹ ہاوس میں ڈسٹرکٹ ہاسپٹلز ویسٹ سپروائزری کمیٹی کے اجلاس کی صدارت کر رہے تھے۔

(جاری ہے)

اجلاس میں ایم پی ایز ، پارلیمانی سیکرٹری ندیم قریشی، معان خصوصی جاویداخترانصاری،طارق عبدللہ، سلیم لابر، وسیم خان بادوزئی اور سبین گل نے شرکت کی۔

سی ای او ہیلتھ ڈاکٹر منور عباس، ڈپٹی ڈائریکٹر ماحولیات اور نشتر ہسپتال کے نمائندے بھی اجلاس میں موجود تھے۔ ڈپٹی کمشنر نے اجلاس سے خطاب کرتے ہوئے کہا کہ تمام پرائیویٹ ہسپتالوں کو میڈیکل ویسٹ ٹھکانے لگانے کے لیے انسینیریٹر لگانے یا متبادل انتظام کرنے کا پابند بنایا جائے اور ہر ہسپتال میں ویسٹ مینجمنٹ کمیٹیاں تشکیل دی جائیں۔ میڈیکل ویسٹ زہر آلود ہوتا ہے، اسے بروقت ٹھکانے لگایا جانا ضروری ہے۔

انہوں نے کہا کہ بڑے بڑے پولٹری فارمز مالکان مری ہوئی مرغیاں ٹھکانے لگانے کی بجائے انہیں اور پولٹری ویسٹ نہروں میں پھینک دیتے ہیں جس سے یہ پانی جانوروں کے پینے قابل نہیں رہتا اور ماحول میں بد بو پھیلا دیتا ہے۔ڈپٹی کمشنر نے کہا کہ متعدد کھلی کچہریوں میں عوام نے انہیں پولٹری فارمز کی آلودگی اور بد بو سے پہنچنے والی اذیت کی شکایت کی ہے۔

عامر خٹک نے ہدایات کی ویسٹ کو ٹھکانے لگانے کا مناسب انتظام نہ کرنے والے پرائیوٹ ہسپتالوں اور پولٹری فارمز کے خلاف سخت ایکشن لیا جائے اور ماحولیات ایکٹ کے تحت مقدمات درج کرائے جائیں۔۔ انہوں نے میڈیکل ویسٹ خریدنے والوں کے خلاف بھی مقدمات درج کرانے کی ہدایت کی ہے۔ ڈپٹی کمشنر نے 9 کسی کے قریب واقع صدیقی پولٹری فارم کو نہری پانی آلودہ کرنے پر سیل کرنے کا حکم بھی دیا۔ اس موقع پر محکمہ ماحولیات کے ڈپٹی ڈائریکٹر نے بریفنگ دیتے ہوئے بتایا کہ ضلع کے 105 ہسپتالوں کے مالکان کو نوٹس جاری کئے جا چکے ہیں اور 70 ہسپتالوں کے مالکان کو چالان کیا گیا ہے۔ بریفنگ میں مزید بتایا گیا کہ میڈیکل ویسٹ خریدنے والی ایک بڑی کمپنی کو سیل کر دیا گیا ہے۔