ڈینگی وائرس سے بچنے کیلئے صفائی پر خصوصی توجہ اور احتیاطی تدابیر اختیار کی جائیں‘ڈاکٹر محمود حسین کیانی

نیلم(اُردو پوائنٹ اخبارتازہ ترین - این این آئی۔ 27 ستمبر2019ء) نیشنل پروگرام برائے خاندانی منصوبہ بندی اے جے کے کوارڈنیٹر ڈاکٹر محمودحسین کیانی کی ہدایت پر ڈی ایچ کیو ہسپتال اٹھ مقام میں ڈینگی وائرس کیخلاف آگاہی مہم واک کاانعقادکیا گیا ہے۔ ڈینگی وائرس کیخلاف احتیاطی تدابیر کے طور پر ڈی ایچ کیوہسپتال اٹھ مقام میں 10 بیڈ مختص کردیئے گئے ہیں۔

ڈینگی وائرس کے مریضوں کیلئے خصوصی کٹس کااہتمام کے ساتھ ساتھ ڈینگی کے متعلقہ کسی بھی ہنگامی صورتحال سے نمنٹنے کیلئے ڈسٹرکٹ ہیڈکوارٹر اٹھ مقام میں اقدامات کردیئے گئے ہیں۔ڈینگی وائرس کیخلاف آگاہی مہم ڈسٹرکٹ ہیڈکوارٹر ہسپتال اٹھ مقام کے زیراہتمام کی گئی جس میں ڈپٹی کمشنر راجہ محمود شاہد،ڈی ایچ او ڈاکٹر غلام نبی، ایم ڈی ایس جھمر کرنل مبشر، اے ڈی EPIصحت عامہ سید مبشر گیلانی، اے ڈی ٹریننگ سمیرہ گل سمیت جملہ میڈیکل سٹاف نے واک میں شرکت کی۔

(جاری ہے)

اس موقع پر ایم ایس ڈاکٹر انور بٹ، ڈی ایچ او ڈاکٹر غلام نبی نے شرکاء سے خطاب کرتے ہوئے کہاکہ ڈینگی وائرس سے بچنے کیلئے صفائی پر خصوصی توجہ اور احتیاطی تدابیر اختیار کی جائیں۔ انہوں نے کہاکہ پینے کے پانی والے برتن (ڈرم، ٹینکی،گھڑے وغیرہ)کو ڈھانپ کررکھاجائے اورگھروں، دفاتر، سکولوں کے اردگرد چھتوں، پودوں، گملوں، میں پانی کھڑا نہ ہونے دیاجائے۔

انہوں نے کہاکہ جہاں مچھروں کی موجودگی کااحساس ہووہاں مچھر مار کیمیکل کاسپرے کااستعمال عمل میں لایاجائے۔انہوں نے کہاکہ ڈینگی وائرس کے مریضوں کو مچھردانی میں رکھاجائے اور مریض کو جوس، پانی، فروٹ اور سوپ وافر مقدار میں دیاجائے اور زیادہ تر آرام کرایاجائے۔ انہوں نے یہ بھی بتایاکہ ایسے مریضوں کو اسپرین، ڈسپرین اوربروفن وغیرہ نہ دی جائے۔

ایم ایس ڈاکٹر انور بٹ، ڈی ایچ او ڈاکٹر غلام نبی نے ڈینگی وائرس کے پھیلنے کے اوقات بارے بھی آگاہ کیاکہ صبح 6سے 9 اورشام 4سے رات 10 بجے تک زیادہ خطرہ لاحق ہوتاہے۔ اس موقع پر ایم ایس ڈی ایچ کیو اٹھ مقام ڈاکٹر انور بٹ نے کہاکہ ڈینگی وائرس کے مریضوں سے نمنٹنے کیلئے ترجیح بنیادوں پر اسپتال میں 10 بیڈ مختص کردیئے ہیں ڈی ایچ او ڈاکٹر غلام نبی نے کہاکہ ڈینگی کے مریضوں کیلئے میڈیکل کیٹس کااہتمام بھی کرلیاہے۔ شارٹ ٹیسٹ کے ذریعے ڈینگی کی تشخص ہوسکتی ہے۔ الحمداللہ وادی نیلم میں ایسی فضائ تونہیں لیکن منتقلی کے خطرات سے نمٹنے کیلئے محکمہ صحت کا سٹاف چوکس ہے