تحریک انصاف پسے ہوئے طبقات کے حقوق کی جنگ لڑ رہی ہے ‘ اعجاز چوہدری ،

انتخابی اصلاحات ،دھاندلی کی تحقیقات کروانے کے مطالبے سے کسی صورت بھی پیچھے نہیں ہٹیں گے

لاہور(اُردو پوائنٹ اخبار تازہ ترین۔29دسمبر 2014ء )پاکستان تحریک انصاف پنجاب کے صدر اعجازاحمدچوہدری سے پنجاب سیکرٹریٹ میں ضلع شیخوپورہ سے ضلعی صدر کنور عمران سعید ، اوکاڑہ سے حسنین نقوی ، سردار محمد حیات ایڈووکیٹ ، چوہدری محمد عمر کسانہ اور چوہدری افتخار کمبوہ سمیت دیگر عہدیداران نے ملاقاتیں کیں، اس موقع پر اعجاز احمدچوہدری نے گفتگو کرتے ہوئے کہاکہ تحریک انصاف پسے ہوئے طبقات کے حقوق کی جنگ لڑ رہی ہے ، انتخابی اصلاحات اور دھاندلی کی تحقیقات کروانے کے مطالبے سے کسی صورت بھی پیچھے نہیں ہٹیں گے،جیسے ہی دھرنے کا پریشر حکومت سے ہٹا تو بجلی اور گیس کی قیمتیں بڑھنا شروع ہو گئی ہیں ،بجلی اور گیس کی قیمتوں میں اضافہ قابل مذمت ہے ، حکومت ہٹ دھرمی چھوڑ کر غریب عوام کو ریلیف دے، بجلی اور گیس کی قیمتیں کم کرے ، انہوں نے کہاکہ حکومت آئی ایم ایف کی پالیسیوں پر عمل پیرا ہے ، حکومت کو چاہئے کہ عوام کی امنگوں کے مطابق پالیسیاں بنائے اور مسائل کے خاتمے کے لئے عملی اقدامات اٹھائے تاکہ غریب عوام سکھ کا سانس لے سکے ، پیپلزپارٹی اور (ن) لیگ کی حکومتوں کی نااہلی کی سزا غریب عوام کو مل رہی ہے ، بجلی اور گیس کی لوڈشیڈنگ کا بحران شدت اختیار کرتا جا رہا ہے ، عوام سراپا احتجاج ہیں لیکن حکمران ٹس سے مس نہیں ہو رہے ۔

Your Thoughts and Comments