ابوظہبی سے دبئی کا سفر بہت جلد 50 منٹ سے بھی کم کا ہوجائے گا

دبئی ( اُردو پوائنٹ اخبارتازہ ترین ۔ 02 مارچ 2022ء ) ابوظہبی سے دبئی کا سفر بہت جلد 50 منٹ سے بھی کم کا ہوجائے گا کیوں کہ ابوظہبی سے دبئی ریلوے لائن اب مکمل ہو گئی ہے ، 13 ہزار 300 کارکنوں نے 27 ماہ میں 256 کلومیٹر لائن بچھائی ۔ اماراتی اخبار خلیج ٹائمز کے مطابق ابوظہبی اور دبئی اب براہ راست ریلوے لائن سے منسلک ہوچکے ہیں ، قومی ریل نیٹ ورک کے حصے کے طور پر یو اے ای کیپٹل اور دبئی کے درمیان لائن کو بنانے میں 47 ملین کام کے گھنٹے اور 27 ماہ لگے ، اگلے چند سالوں میں مکمل طور پر چلنے کے بعد مسافر ٹرینیں 50 منٹ سے بھی کم وقت میں دونوں امارات کے درمیان سفر کرتی ہوئی نظر آئیں گی۔

بتایا گیا ہے کہ 256 کلومیٹر طویل ٹریک میں 29 پل ، 60 کراسنگ اور 137 نکاسی آب کے راستے شامل ہیں ، کل کھدائی اور بیک فل کام 46 ملین مکعب میٹر تھا ، تعمیراتی عمل میں 13 ہزار 300 سے زائد کارکنوں نے حصہ لیا ، دبئی کے نائب حکمران، نائب وزیر اعظم اور وزیر خزانہ شیخ مکتوم بن محمد بن راشد آل مکتوم نے کہا کہ انہوں نے ابوظہبی کے ولی عہد کی عدالت اور اتحاد ریل کے چیئرمین شیخ طیب بن محمد بن زاید النہیان کے ساتھ اس کا مشاہدہ کیا۔

(جاری ہے)

انہوں نے کہا کہ ابوظہبی اور دبئی کے درمیان اس لنک کی تکمیل اتحاد ریلوے کے لیے ایک بڑی کامیابی ہے ، اقتصادی اور ترقیاتی فوائد کئی سالوں تک بڑھیں گے اور متحدہ عرب امارات کی مسابقت بڑھے گی ، سب سے اہم بات یہ ہے کہ اس عظیم قومی منصوبے کے ساتھ ملک کے تمام خطوں میں اتحاد کا جذبہ جڑ پکڑے گا۔ بتاتے چلیں کہ ریلوے پروگرام 50 UAE کے منصوبوں کے ایک حصے کے طور پر شروع کیا گیا تھا ، جس میں 50 بلین درہم کی سرمایہ کاری تھی ، اس میں ریلوے منصوبوں کا ایک قومی نیٹ ورک شامل ہے جو سات امارات کو آپس میں جوڑ دے گا ، اس پروگرام سے 200 بلین درہم کے اقتصادی مواقع پیدا ہونے کی توقع ہے۔

معلوم ہوا ہے کہ اتحاد ریل کی مسافر خدمات اپنی نوعیت کی پہلی ہوں گی، جو متحدہ عرب امارات کے شہروں اور علاقوں کو آپس میں جوڑیں گی ، قومی ریلوے پروگرام ، جسے متحدہ عرب امارات کی حکومت نے دسمبر 2021ء میں شروع کیا تھا ، ملک میں زمینی نقل و حمل کا سب سے بڑا نظام تشکیل دیتا ہے ، جس کے تحت مسافر ٹرینیں السیلہ سے فجیرہ تک 11 شہروں اور مقامات کو جوڑ کر متحدہ عرب امارات کے درمیان رابطے کو مضبوط بنائیں گی۔

خیال ظاہر کیا جارہا ہے کہ فی ٹرین 400 مسافروں کی گنجائش کے ساتھ 200 کلومیٹر فی گھنٹہ کی رفتار سے سفر کرنے والے صارفین کی تعداد 2030 تک ملک بھر میں سالانہ 36.5 ملین سے زیادہ ہونے کی توقع ہے ، مسافر ابوظہبی اور فجیرہ کے درمیان 100 منٹ میں سفر کر سکیں گے ، 50 منٹ میں دبئی اور فجیرہ کے درمیان اور ابوظہبی اور الرویس کے درمیان 70 منٹ میں سفر ممکن ہوجائے گا۔