جعلی بینک اکائونٹس کیس میں اومنی گروپ کے عبدالغنی مجید نے طبی بنیادوں پر ضمانت کیلئے اسلام آباد ہائی کورٹ میں درخواست دائر کر دی

منگل 18 فروری 2020 19:40

اسلام آباد ۔ (اُردو پوائنٹ اخبارتازہ ترین - اے پی پی۔ 18 فروری2020ء) جعلی بینک اکائونٹس کیس میں اومنی گروپ کے خواجہ عبدالغنی مجید نے سندھ روشن پروگرام کرپشن کیس میں طبی بنیادوں پر ضمانت کیلئے اسلام آباد ہائی کورٹ میں درخواست دائر کر دی ہے۔ منگل کو عدالت عالیہ میںجعلی بینک اکائونٹس کیس میں ملوث اومنی گروپ کے خواجہ عبدالغنی مجید کی جانب سے سندھ روشن پروگرام کرپشن کیس میں بھی طبی بنیادوں پر ضمانت کیلئے درخواست دائر کی گئی۔

دائر درخواست ضمانت میں چیئرمین نیب، کیس کے تفتیشی آفیسر اور سپرنٹنڈنٹ اڈیالہ جیل کو فریق بنایا گیا ہے۔ درخواست میں مؤقف اختیار کیا گیا ہے کہ 2018 میں ایف آئی اے نے کراچی سے عبدالغنی مجید کو گرفتار کیا، 13 روزہ جسمانی ریمانڈ کے بعد جناح میڈیکل سنٹر منتقل کیا گیا اور اب وہ اڈیالہ جیل میں قید ہیں۔

(جاری ہے)

درخواست میں عبدالغنی مجید کی طرف سے کہا گیا ہے کہ وہ کینسر جیسے موذی مرض میں مبتلا ہیں، کینسر جسم میں پھیل رہا ہے۔

عدالت سے استدعا ہے کہ طبی بنیادوں پر ضمانت منظور کرکے رہائی کا حکم دیا جائے۔ درخواست میں عدالت سے میڈیکل بورڈ بنانے کی بھی استدعا کی گئی ہے۔ واضح رہے کہ اس سے پہلے اسلام آباد ہائی کورٹ نے عبدالغنی مجید کو جعلی بینک اکائونٹس کیس میں بھی 10 کروڑ کے ضمانتی مچلکوں کے عوض طبی بنیادوں پر ضمانت دی تھی۔