خیبر پختونخوا میں کرونا مریضوں کی تعداد 48 ہزار سے زائد ہو چکی،صوبائی وزیر محنت

اسلام آباد۔4دسمبر  (اُردو پوائنٹ اخبارتازہ ترین - اے پی پی۔ 04 دسمبر2020ء) :خیبر پختونخوا کے وزیر برائے محنت و ثقافت شوکت یوسفزئی نے کہا ہے کہ اپوزیشن ناکام ایجنڈے پر کام کر رہی ہے وہ عوام کو سڑکوں پر لاکر مروانا چاہتی ہے۔ پی ڈی ایم کا ایجنڈا ہے کہ کرونا پھیلے اور معیشت بیٹھ جائے لیکن یہ صورتحال نہیں آنے دیں گے۔ جو بھی کرونا پھیلانے کا باعث بنے گا ان کے خلاف سخت اقدامات اٹھائے جائیں گے۔

اپنے ایک ویڈیو پیغام میں شوکت یوسفزئی نے کہا ہے کہ پی ڈی ایم انتشار کی سیاست کر رہی ہے اس وقت پوری دنیا کرونا سے لڑ رہی ہے۔ عمران خان پوری کوشش کر رہے ہیں کہ معیشت اور عوام دونوں کو بچائیں، لیکن دوسری طرف اپوزیشن غیر سنجیدہ رویہ اپنائے ہوئے ہے۔ انہوں نے کہا کہ احتجاج اور جلسوں سے حکومتیں نہیں گرتیں نہ حکومت پر کوئی فرق پڑتا ہے لیکن عوام کی زندگیوں کو خطرے میں ڈالنے کی اجازت نہیں دی جا سکتی۔

(جاری ہے)

شوکت یوسفزئی نے کہا کہ انتہائی افسوس ناک بات ہے کہ اپوزیشن کرپشن بچانے کے لیے عوام کو استعمال کرنا چاہتی ہے۔ انہوں نے کہا کہ پنڈیمک ایکٹ کے تحت ان کے خلاف عوام کو اکسانے اور کرونا پھیلانے پر سخت کارروائی کریں گے۔شوکت یوسفزئی نے کہا کہ خیبر پختونخوا میں کرونا مریضوں کی تعداد 48 ہزار سے زائد ہو چکی ہے۔ بڑے بڑے ہسپتالوں میں کرونا مریضوں کے لیے بیڈز ختم ہوچکے ہیں یہ صورتحال انتہائی تشویشناک ہے ہمیں ہوش کے ناخن لینے ہونگے۔ اپوزیشن جو کھیل کھیل رہی ہے وہ انتہائی خطرناک ہے۔