اپنے شہداء کے مشن کو مرتے دم تک جاری رکھیں گے،سربراہ پاکستان سنی تحریک

کراچی (اُردو پوائنٹ اخبارتازہ ترین - این این آئی۔ 30 نومبر2021ء) سربراہ پاکستان سنی تحریک محمد ثروت اعجاز قادری نے کہا ہے کہ ہم اپنے شہداء کے مشن کو مرتے دم تک جاری رکھیں گے۔ پی ایس ٹی کے قائدین اور کارکنان کی شہادتوں کے سفر کو ہم نے اپنے سروں پر کفن کی صورت میں باندھا ہوا ہے اور ہم اس ملک میں نظام مصطفی کے نفاذ تک اپنی جدوجہد جاری رکھیں گے،ان خیالات کا اظہار انہوںنے پی ایس ٹی کے مرکزی سیکرٹریٹ میں کراچی کے ذمہ داران سے خطاب کرتے ہوئے کیا۔

محمد ثروت اعجاز قادری نے کہا کہ آج ہمارے حکمران ریاست مدینہ کی باتیں ضرور کررہے ہیں لیکن وہ ریاست مدینہ کی بجائے اپنی پالیسیوں کو یہود و نصاریٰ کے اشاروں پر چلا رہے ہیں۔ انہوں نے کہا کہ آج ہماری صوبائی اور وفاقی حکومتیں صرف اور صرف اقتدار کی حوس میں مبتلا ہیں اور جو صورتحال ان کے باعث عوام کو بھگتنا پڑ رہی ہیں اور جس مہنگائی کے سونامی نے آج اس ملک کے عوام کومہنگائی کے دلدل میں دھکیل دیا ہے اس کا واحد حل صرف اور صرف حقیقی نظام مصطفی کا ملک میں نفاذ ہے۔

(جاری ہے)

انہوں نے کہا کہ آج کراچی سمیت سندھ بھر میں عوام گیس، بجلی، مہنگائی اور اسٹریٹ کرائم میں پھنس چکی ہے اور اس کے مکمل ذمہ دار صرف اور صرف حکمران ہیں۔ انہوںنے کہا کہ انشاء اللہ پاکستان سنی تحریک کل بھی اپنے شہید قائدین کے مشن کو لے کر چلی تھی اور آج بھی ہم اسی مشن پر گامزن ہیں اور تمام تر رکاوٹوں اور مشکلات کے باوجود ہم اس ملک میں حقیقی نظام مصطفی کے نفاذ پر اپنی جدوجہد جاری رکھیں گے اور انشاء اللہ اس ملک میں یارسول اللہ کا نعرہ لگانے والوں کا ہی بول بالا ہوگا۔