جلد بحران پر قابو پا لیں گے، آنے والے دنوں میں ملک کی ترقی دیکھیں گے، گورنرسندھ

کراچی (اُردو پوائنٹ اخبارتازہ ترین - اے پی پی۔ 25 اپریل2024ء) گورنر سندھ کامران خان ٹیسوری نے کہا ہے کہ گورنر انیشیٹیو کے تحت روزگار اسکیم شروع کرنے جارہے۔ انہوں نے مزید کہا کہ وزیراعظم کے ساتھ تاجروں سے ملاقات ہوئی،ان کے مسائل وزیراعظم صا حب کو دیئے،مقصد صرف یہ ہے کہ ملک اور صوبہ ترقی کرے۔گورنر ہائو س سے جاری اعلامیہ کے مطابق ان خیالات کا اظہار انہوں نے جمعرات کو گورنرہائوس میں موٹر سائیکلز اور امدادی چیک تقسیم کرنے کی تقریب سے خطاب کرتے ہوئے کیا۔

گورنرسندھ نے کہا کہ دیگر ممالک کی عمارتیں دیکھ وہاں کی ترقی کا اندازہ لگایا جاتا ہے،شاہراہ فیصل کے اطراف کثیر المنزلہ عمارتیں تعمیر کریں گے۔انہوں نے کہا کہ رات دن دل سے کوشش کی ہے کہ لوگوں کے لیے آسانیاں پیدا کریں،بیرونی طاقتیں ملک کی ترقی کبھی نہیں چاہیں گی۔

(جاری ہے)

انہوں نے کہا کہ عسکری قیادت معاشی چیلنجز کا بھی مقابلہ کر ر ہی ہیں،بیرونی سرمایہ کاری تمام سازشوں کا جواب دینے کے لیے کافی ہے۔

ایک سوال کے جواب میں گورنرسندھ نے کہا کہ تجوری ہائٹس سے میرا کوئی تعلق نہیں ہے۔ انہوں نے کہا کہ ساری زندگی کوئی کسی سیٹ پر نہیں رہتا،میرا وعدہ ہے کہ میرے سارے اینیشیٹو جاری رہیں گے۔ ایک اور سوال کے جواب میں گورنرسندھ نے کہا کہ اسٹریٹ کرائم پر سندھ گورنمنٹ کام کررہی ہے اس حوالے سے آئی جی اور سی ایم سے بات ہوئی ہے، ایک سال کے اندر سیف سٹی پروجیکٹ مکمل کرلیا جائے گا۔

انہوں نے کہا کہ ٹارگٹ کلنگ کے دوران مارے گئے لوگوں کے لواحقین سے معذرت چاہتا ہوں،ٹارگٹ کلنگ کا شکار لوگوں کی مالی مدد بھی کی ہے،لوگوں کو پہلے سے کہی زیادہ ہماری ضرورت ہے۔ انہوں نے کہا کہ غیر ملکی سرمایہ کاری آرہی ہے،آنے والے دنوں میں ملک کی ترقی دیکھیں گے،جلد ملک کے بحران پر قابو پا لیں گے۔ تقریب میں چالیس افراد کو ما لی امداد کے چیک دیئے گئے۔