پنجاب حکومت کا عیدالاضحی پر قربانی کے جانوروں کے سیل پوائنٹس پر بیوپاریوں سے فیس وصول نہ کرنے کا فیصلہ

لاہور (اُردو پوائنٹ اخبارتازہ ترین - اے پی پی۔ 22 مئی2024ء) پنجاب حکومت نے عیدالاضحی کے موقع پر قربانی کے جانوروں کے سیل پوائنٹس پر بیوپاریوں سے فیس وصول نہ کرنے کا فیصلہ کیا ہے۔ وزیراعلی پنجاب مریم نوازنے ہدایت کی ہے کہ بکرا عید پر ''زیرو ویسٹ'' ہر صورت میں یقینی بنایا جائے گا۔ اس سلسلے میں وزیر بلدیات ذیشان رفیق کی زیر صدارت پنجاب بھر کے میونسپل اداروں کے چیف آفیسرز کے ویڈیو لنک اجلاس میں عیدالاضحی پلان کو حتمی شکل دی گئی۔

سیکرٹری بلدیات پنجاب شکیل احمد میاں، ایڈیشنل سیکرٹری ماریہ طارق اور سیکرٹری لوکل گورنمنٹ بورڈ نے شرکت کی۔ وزیر بلدیات نے کہا کہ جانور سیل پوائنٹس ''نو پرافٹ نو لاس'' کی بنیاد پر قائم کئے جائیں گے۔ اجلاس میں عیدالاضحی سے 10روز قبل اور 3 روز بعد تک میونسپل ملازمین کی چھٹیوں پر پابندی کا بھی فیصلہ کیا گیاہے۔

(جاری ہے)

ذیشان رفیق کی ہدایت کے مطابق شہروں میں قربانی والے ہر گھر میں ماحول دوست بیگز مفت فراہم کئے جائیں تاکہ آلائشیں ٹھکانے لگانے میں آسانی ہو۔

انہوں نے خبردار کیا کہ وہ مختلف شہروں میں جانور سیل پوائنٹس کے خود اچانک دورے کر کے سہولیات کی فراہمی کا جائزہ لیں گے۔ انہوں نے کہا کہ وزیراعلی کی واضح ہدایات ہیں صفائی انتظامات پر سمجھوتہ نہیں ہوگا لہذا محکمہ بلدیات کے سنیئر افسر بھی فیلڈ کے دورے کریں۔انہوں نے یہ ہدایت بھی کی کہ میونسپل سٹاف ڈیڈ لائن ختم ہونے کا انتظار کئے بغیر الائشیں ساتھ ساتھ ٹھکانے لگائے۔

وزیر بلدیات نے ہر میونسپل کمیٹی سے عیدالاضحی کی حکمت عملی تحریری طور پر طلب کرتے ہوئے کہا کہ چیف آفیسرز نمایاں مقامات اور سیل پوائنٹس پر اپنا موبائل نمبر آویزاں کریں۔ سیکرٹری بلدیات آفس میں صوبائی مانیٹرنگ سیل قائم کیا جائے گا۔انہوں نے کہا کہ ہر علاقے کے منتخب نمائندوں کو بھی مانیٹرنگ عمل میں شامل کیا جائے۔ عید کی چھٹیوں میں صفائی میں کوتاہی برداشت نہیں کی جائے گی۔

انہوں نے ہدایت کی کہ گندگی کے حوالے سے میڈیا کی رپورٹنگ پر فوراً کارروائی کی جائے اور صحافیوں کو عید پلان آگاہ رکھا جائے۔ اجلاس کے دوران سیکرٹری لوکل گورنمنٹ شکیل احمد میاں نے کہا کہ عیدالاضحی سے متعلق تحریری ہدایات جاری کی جا چکی ہیں۔ تمام چیف آفیسرز ان پر عملدرآمد یقینی بنائیں۔ انہوں نے ہدایت کی کہ عیدالاضحی پر صفائی انتظامات کے لئے ستھرا پنجاب پروگرام کا نیٹ ورک بھی بروئے کار لایا جائے۔