گرمیوں کی چھٹیوں کے بعد ضلع بھر کے تمام سرکاری سکولوں میں تدریسی سرگرمیوں کا آغاز ہو گیا

ہفتہ 11 اگست 2018 23:24

لالہ موسیٰ۔11 اگست(اُردو پوائنٹ اخبارتازہ ترین - اے پی پی۔ 11 اگست2018ء) گرمیوں کی چھٹیوں کے اختتام کے بعد ضلع بھر کے تمام سرکاری سکولوں میں تدریسی سرگرمیوں کا آغاز ہو گیا، ڈسٹرکٹ ایجوکیشن آفیسرز نے مختلف سکولز میں چھٹیوں کے بعد آنے والے طلباء و طالبات کو خوش آمدید کہا۔ ڈی ای او زنانہ رفعت النسا نے گورنمنٹ پرائمری سکول غازی چک، کمیونٹی ماڈل گرلز پرائمری سکول کٹھالہ چناب، گورنمنٹ گرلز پرائمری سکول گورالی، ایم سی گرلز سکول کالرہ خاصا، ایم سی گرلز سکول چوک نواب صاحب کے دورہ کے موقع پر طالبات کوہدایت کی کہ وہ اپنی تعلیم پر بھرپور توجہ دیں ، باقاعدگی سے سکول آئیں اور کورس ورک کی بروقت تکمیل کیلئے محنت کریں ۔

انہوںنے اساتذہ کو بھی ہدایت کی کہ وہ طالبات کو زیور تعلیم سے آراستہ کرنے کیلئے پہلے سے بھی بڑھ کر محنت اور لگن سے اپنے فرائض منصبی ادا کریں، ہیڈ ٹیچرز اپنے سکولوں میں فوری طور پر ٹیسٹوں کا انعقاد کرائیں اورسامنے آنیوالی خامیوں پر قابو پانے کیلئے توجہ دی جائے۔

(جاری ہے)

ڈی ای او سیکنڈری افضل شاہد ، ڈی ای او ایلیمنٹری محمد پرویز نے اساتذہ و طلبہ کی حاضری ، سکولوں میں صفائی کی صورتحال کا جائزہ لیا۔ انہوںنے اسسٹنٹ ایجوکیشن آفیسرز اور ڈپٹی ڈسٹرکٹ ایجوکیشن آفیسرز کو اپنے زیر انتظام سکولوں پر بھرپور توجہ دینے کی بھی ہدایت کی۔