کابل سے انخلا کا عمل عنقریب شروع کریں گے،امریکی محکمہ خارجہ

محکمہ خارجہ نے ابھی تک انخلا کیلیے پروازوں کی بحالی کی کوئی تاریخ طے نہیں کی ہے ،سینئرعہدیدار

جمعہ 15 اکتوبر 2021 11:15

واشنگٹن(اُردو پوائنٹ اخبارتازہ ترین - این این آئی۔ 15 اکتوبر2021ء) امریکی محکمہ خارجہ کے ایک سئینر عہدیدار نے انکشاف کیا ہے کہ وزارت خارجہ رواں سال کے اختتام سے قبل افغانستان سے باقاعدہ انخلا کی پروازیں دوبارہ شروع کرنے کا ارادہ رکھتا ہے تاکہ امریکی شہریوں ، رہائشیوں اور کچھ ویزا درخواست گزاروں کو ملک چھوڑنے میں مدد مل سکے۔ انخلا کے عمل میں ہونے والی کوششوں کے لیے طالبان اور دیگر حکومتوں کے ساتھ ہم آہنگی کی ضرورت ہوگی۔

امریکی خبررساں ادارے کے مطابق عہدیدار نے کہا کہ محکمہ خارجہ نے ابھی تک انخلا کیلیے پروازوں کی بحالی کی کوئی تاریخ طے نہیں کی ہے کیونکہ یہ آج بھی پڑوسی ممالک کے ساتھ انتظامات کے ذریعے کام کر رہا ہے۔انہوں نے وضاحت کی کہ امریکا جن مسائل پر کام کیا جا رہا ہے ان میں مسافروں کے لیے دستاویزات ، دوسرے ممالک سے پرواز کرنے کی اجازت اور طالبان اور غیر ملکی حکومتوں کے ساتھ طریقہ کار شامل ہیں۔

(جاری ہے)

اسی تناظر میں اخبار نے محکمہ خارجہ کے ایک دوسرے سینئر عہدیدار کے حوالے سے بتایا کہ امریکا نے چارٹر پروازوں کو تیز کرنے کے لیے کام کیا ہے۔31 اگست کے بعد 200 سے زائد امریکی شہری اور مقامی افغان چارٹر پروازوں سے افغانستان چھوڑ چکے ہیں۔عہدیدار نے مزید کہا کہ ہمارا ہدف جاری چارٹر پروازوں کی رفتار کو تیز کرنا ہے۔ ہم ایسا کرنے کے لیے اپنے شراکت داروں کے ساتھ مل کر کام کر رہے ہیں۔عہدیدار نے یہ بھی بتایا کہ محکمہ خارجہ ہر ہفتے کئی پروازیں چلانے کا ارادہ رکھتا ہے۔انہوں نے وضاحت کی کہ جب تک ہوائی اڈے کو دوبارہ نہیں کھولا جاتا ، چارٹر پروازوں سے کام چلانا پڑ سکتا ہے کیونکہ عام ایئر لائنز کو مطلوبہ انشورنس پریمیم ادا کرنا بہت مشکل ہو گا۔

مری شہر میں شائع ہونے والی مزید خبریں:

Your Thoughts and Comments