پشین،آسمانی بجلی گرنے سے 2 افراد جاں بحق، 50 جانور ہلاک

پیر 11 مارچ 2024 22:47

پشین (اُردو پوائنٹ اخبارتازہ ترین - این این آئی۔ 11 مارچ2024ء) بلوچستان کے ضلع پشین کے علاقے سرانان میں رات گئے 3 مقامات پر آسمانی بجلی گرنے کے واقعات پیش آئے۔لیویز ذرائع کے مطابق سرانان کیمپ میں خانہ بدوشوں کے جھونپڑی پر آسمانی بجلی گرنے سے 2 افراد جاں بحق اور 3 جھونپڑیاں جل گئیں۔ذرائع کے مطابق آسمانی بجلی گرنے سے 50 جانور بھی ہلاک ہوئے ہیں۔

(جاری ہے)

مغربی سسٹم جنوب اور شمال سے بلوچستان میں داخل ہو گیا ہے، شمال بالائی علاقوں میں گرج چمک کے ساتھ ژالہ باری ہوئی۔پی ڈی ایم اے کے مطابق بلوچستان کے ساحلی اور شمال بالائی علاقوں میں بارش کا نیا سلسلہ شروع ہو گیا ہے، مغربی سسٹم سے پاک افغان اور پاک ایران سرحدی علاقے زیر اثر آگئے ہیں۔دوسری جانب محکمہ موسمیات نے بتایا کہ پشاور میں کم سے کم درجہ حرارت 11 ڈگری سینٹی گریڈ ریکارڈ کیا گیا جبکہ کالام میں کم سے کم درجہ حرارت منفی 4 اور چترال میں کم سے کم درجہ حرارت 1 ڈگری سینٹی گریڈ ریکارڈ کیا گیا ہے۔محکمہ موسمیات کے مطابق خیبرپخونخوا کے بالائی اضلاع میں 13 مارچ سے بارشیں متوقع ہیں۔