قومی جوڈو کھلاڑی جدید اور اعلیٰ معیار کی تربیت کیلئے 2 مارچ کو ہنگری روانہ ہوں گے

اسلام آباد ۔ (اُردو پوائنٹ اخبارتازہ ترین - اے پی پی۔ 27 فروری2018ء) جوڈو کے 3 قومی کھلاڑی جدید اور اعلی معیار کی تربیت کیلئے 2 مارچ کو ہنگری روانہ ہوں گے۔ پاکستان جوڈو فیڈریشن (پی جے ایف) کے نائب صدر اور میڈیا ڈائریکٹر مسعود احمد خان کے مطابق فیڈریشن نے تین کھلاڑیوں کے نام ہنگری میں سفارتخانے کو ویزے کیلئے بھیجوائے ہیں۔ امید ہے قومی کھلاڑیوں کو ویزے یکم مارچ کو مل جائیں گے۔

پاکستان جوڈو فیڈریشن شاہ حسین شاہ، قیصر خان اور افتخار احمد کو جدید اور اعلیٰ معیار کی تربیت کیلئے ہنگری بھجوائے گی جبکہ مدثر علی کو ریزرو میں رکھا گیا ہے۔ تربیتی پروگرام 2 ماہ پر محیط ہو گا جس میں شرکت کیلئے قومی کھلاڑی 2 مارچ کو ہنگری روانہ ہوں گے۔ انہوں نے کہاکہ پاکستانی کھلاڑی ہنگری میں آئی جے ایف ٹریننگ کیمپ میں تربیت حاصل کریں گے اور وہاں پر بین الاقوامی کوچ انہیں بھر پور تربیت دیں گے۔

(جاری ہے)

انہوں نے کہاکہ پاکستان جوڈو فیڈریشن نے قیصر خان کو ارجنٹائن میں ہونے والے یوتھ اولمپک 2018ء کیلئے میدان میں اتارنے کا فیصلہ کیا ہے۔ قیصر خان کو یوتھ اولمپک سے قبل کوالیفائنگ رائوند کو عبورکرنا پڑے گا۔ یوتھ اولمپکس کیلئے کوالیفکیشن رائونڈ شروع ہوگئے۔ مسعود احمد خان نے کہاکہ فیڈریشن نے شاہ حسین شاہ اور افتخار احمد کو جاپان میں ہونے والے 2020ء اولمپکس گیمز کیلئے تیارکرنے کا منصوبہ بنایا ہے جس کے کوالیفکیشن رائونڈ اگست کے بعد شروع ہوں گے۔