انگلش کرکٹ بورڈ کو اب دورہ پاکستان کے شیڈول کا فیصلہ کرنا چاہیے: شاہ محمود قریشی

لاہور (اردو پوائنٹ تازہ ترین اخبار ۔ 8 اکتوبر 2021ء ) وزیر خارجہ شاہ محمود قریشی نے کہا کہ انگلینڈ اور ویلز کرکٹ بورڈ (ای سی بی) کو اپنے پاکستان کے دورے کو دوبارہ شیڈول کرنے کے لیے سوچنا چاہیے۔ ای سی بی کے چیئرمین این واٹمور کے عہدے سے سبکدوش ہونے کے بعد نجی ٹی وی سے گفتگو کرتے ہوئے شاہ محمود قریشی نے کہا کہ اس استعفیٰ کا مطلب ہے کہ پاکستان دنیا میں اپنا مؤقف درج کرنے میں کامیاب ہوگیا۔

شاہ محمود قریشی نے کہا کہ ان تمام واقعات کے بعد ای سی بی کے سربراہ کے استعفیٰ کا مطلب ہے کہ ہم نے پاکستان کا دورہ منسوخ کرنے کے بعد دنیا کے سامنے ایک مضبوط موقف درج کرنے میں کامیابی حاصل کی۔ ان کا مزید کہنا تھا کہ انگلش کرکٹ بورڈ کو اب جلد از جلد پاکستان کے دورے کو دوبارہ سے طے کرنے کے بارے میں سوچنا چاہیے، ہم نے نیوزی لینڈ اور انگلینڈ دونوں کو فول پروف سکیورٹی دینے کی یقین دہانی کروائی تھی، دونوں کرکٹ بورڈز کو ایسا سخت فیصلہ لینے سے پہلے ہم سے بات کرنی چاہیے تھی۔

(جاری ہے)

شاہ محمود قریشی نے اپنی برطانوی ہم منصب الزبتھ ٹروس کے ساتھ اپنی ملاقات کو مزید یاد کیا جس کے دوران انہوں نے کرکٹ سیریز منسوخی کا معاملہ اٹھایا۔ ان کا کہنا تھا کہ میں نے ٹرس کے ساتھ اپنی ملاقات کے ساتھ اس معاملے کے بارے میں بات کی۔ انہوں نے مجھے بتایا کہ یہ فیصلہ برطانوی حکومت کی جانب سے نہیں کیا گیا ۔ انہوں نے یہ معاملہ ای سی بی کے سامنے اٹھانے کی یقین دہانی بھی کرائی۔