راشد خان نے زلزلے سے متاثرہ بچی کی دکھ بھری کہانی شیئر کردی

کابل (اردو پوائنٹ تازہ ترین اخبار ۔ 23 جون 2022ء ) افغانستان کرکٹ ٹیم کے سٹار آل راؤنڈر راشد خان نے زلزلے سے متاثرہ بچی کی کہانی شیئر کردی۔ سماجی رابطے کی سائٹ ٹوئٹر پر ایک چھوٹی بچی کی تصویر شیئر کی ہے، جس میں انہوں نے لکھا ہے کہ ’’ یہ ننھی بچی اپنے خاندان کی واحد زندہ رکن ہے ،حکام اس کے خاندان کے کسی دوسرے فرد کو تلاش نہیں کر سکے ہیں۔

(جاری ہے)

انہوں نے یہ بھی لکھا کہ لینڈ سلائیڈنگ کے باعث کئی مکانات زمین بوس ہو گئے ہیں، بہت سے لوگ ملبے تلے اور دور دراز علاقوں میں پھنسے ہوئے ہیں‘‘ ۔

خیال رہے کہ گزشتہ روز افغانستان میں 6 اعشاریہ 1 شدت کا زلزلہ آیا تھا، جس میں اب تک 1000 سے زائد افراد جاں بحق اور 1500 زخمی ہوچکے ہیں۔ غیر ملکی خبر ایجنسی کے مطابق 6 اعشاریہ 1 شدت کا یہ زلزلہ خوست سے تقریباً 44 کلومیٹر (27 میل) کے فاصلے پر 51 کلو میٹر کی گہرائی میں آیا تھا۔