فیفا ورلڈ کپ کا فائنل میرا آخری میچ ہو گا، لیونل میسی نے ریٹائرمنٹ کی تصدیق کر دی

دوحہ ( اُردو پوائنٹ اخبارتازہ ترین ۔ 14 دسمبر 2022ء ) فیفا ورلڈ کپ کا فائنل میرا آخری میچ ہو گا، لیونل میسی نے ریٹائرمنٹ کی تصدیق کر دی۔ کروشیا کو شکست دینے کے بعد ارجنٹینا کے میڈیا سے گفتگو کرتے ہوئے لیونل میسی نے کہا کہ ورلڈ کپ فائنل میں اپنا آخری میچ کھیل کر اس سفر کو ختم کرنے پر خوش ہوں۔ تفصیلات کے مطابق مشہور فٹبالر اور ارجنٹینا کے کپتان لیونل میسی نے ورلڈ کپ 2022ء کے فائنل میچ کے بعد ریٹائرمنٹ کا اشارہ دے دیا۔

غیرملکی میڈیا کے مطابق سیمی فائنل میں کروشیا کو شکست دینے کے بعد ارجنٹینا کے میڈیا سے گفتگو کرتے ہوئے لیونل میسی نے کہا کہ ورلڈ کپ فائنل میں اپنا آخری میچ کھیل کر اس سفر کو ختم کرنے پر خوش ہوں۔ ارجنٹینا سے تعلق رکھنے والے 35 سالہ لیونل میسی نے کہا کہ اس طرح کا اختتام بہترین ہے۔

(جاری ہے)

لیونل میسی نے کہا کہ اگلے ورلڈ کپ میں بہت وقت ہے اور مجھے نہیں لگتا کہ میں وہ کھیل سکوں گا۔

دوسری جانب کروشیا کے خلاف سیمی فائنل میں جیت کے بعد لیونل میسی نے ساتھی کھلاڑیوں پر زور دیا کہ اس موقع سے لطف اٹھائیں اور کہا کہ ارجنٹینا ایک مرتبہ پھر فائنل میں پہنچ گیا۔ لیونل میسی نے مزید کہا کہ ہم مشکل حالات سے گزرے ہیں۔ اس سے قبل ارجنٹینا کے کوچ نے امید ظاہر کی تھی لیونل میسی ورلڈ کپ کے بعد انٹرنیشنل میچز کھیلتے رہیں گے۔ واضح رہے کہ فیفا ورلڈ کپ 2022 کے پہلے سیمی فائنل میں لیونل میسی کی ارجنٹینا کروشیا کو 3 صفر سے شکست دے کر چھٹی بار فٹ بال ورلڈ کپ کے فائنل میں پہنچ گئی ہے۔

میگا ایونٹ کے دوسرے سیمی فائنل میں فرانس کا مقابلہ مراکش سے کل رات 12 بجے ہوگا، جیتنے والی ٹیم اتوار کے روز فائنل میں ارجنٹینا سے مدمقابل ہوگی۔ خیال رہے کہ ارجنٹینا کے کپتان لیونل میسی نے ورلڈکپ میں سب سے زیادہ میچ کھیلنے کا ریکارڈ برابر کردیا۔ لیونل میسی پانچویں مرتبہ ورلڈکپ میں کھیل رہے ہیں اور انہوں نے ارجنٹائن کے لیے 25 میچ کھیل لیے ہیں۔

اس سے قبل یہ ریکارڈ جرمنی کے لوتھر میتھاؤس کے پاس تھا۔ دوسری جانب لیونل میسی نے جو ریکارڈ برابر کیا ان کے پاس اتوار کو اسے توڑنے کا موقع بھی ہوگا۔ ورلڈ کپ کے دوسرے سیمی فائنل میں فرانس کا مقابلہ مراکش سے کل رات 12 بجے ہوگا، جیتنے والی ٹیم اتوار کے روز فائنل میں ارجنٹینا سے مدمقابل ہوگی۔ اس کے علاوہ لیونل میسی ورلڈکپ میں ارجنٹینا کے لیے 11 گول کرنے والے پہلے پلیئر بھی بن گئے ہیں، انہوں نے سابق کھلاڑی بیٹسٹوٹا کا ریکارڈ توڑا ہے۔ فٹبال ورلڈ کے سیمی فائنل میں کروشیا کے خلاف ارجنٹینا کے 2 گول جولین ایلوریز اور 1 گول میسی نے اسکور کیا تھا۔