بابر اعظم میں کپتانی کی صلاحیت نہیں ہے : عبدالرزاق

لاہور (اردو پوائنٹ تازہ ترین اخبار ۔ 22 فروری 2024ء ) سابق ٹیسٹ کرکٹر عبدالرزاق کا کہنا ہے کہ بابر اعظم کے اندر کپتانی کی صلاحیت نہیں، انہیں کپتان نہیں ہونا چاہیے۔ جیو نیوز کے پروگرام میں گفتگو کرتے ہوئے 44 سالہ عبدالرزاق نے کہا کہ میری کوشش ہوتی ہے کہ ایسی بات کی جائے جو لوگوں کو نہ پتا ہو۔ عبدالرزاق کا کہنا تھا کہ بابر اعظم کو پولارڈ کے سامنے تجربہ کار بائولر کو لانا چاہیے تھا، پولارڈ ٹی20 فارمیٹ کے آخری 3 اوورز میں 60 رنز بھی بنانے کی صلاحیت رکھتے ہیں۔

(جاری ہے)

انہوں نے کہا کہ بابر اعظم جس طرح کی بیٹنگ کرتے ہیں وہ مومینٹم بنا کر دیتے ہیں، بابر جس ٹیم میں ہوتے ہیں ان کا مڈل آرڈر مضبوط ہونا چاہیے۔ واضح رہے کہ بابراعظم کی قیادت میں پشاور زلمی کو رواں سیزن میں لگاتار تیسری شکست کا منہ دیکھنا پڑا ہے، بابر بطور بیٹر کامیاب رہے ہیں لیکن ٹیم میچ جیتنے سے قاصر ہے۔ گزشتہ روز کراچی کنگز نے پشاور زلمی کو 7 وکٹوں کی شکست سے دوچار کیا تھا۔