مجھ سے زیادہ کسی نے اپنی بیٹنگ پوزیشن کی قربانی نہیں دی، بابر اعظم کا دعویٰ

جتنے بیٹنگ نمبر میں نے تبدیل کیے، کسی نے نہیں کیے، کسی کے آنے پر بابر نے ہی نمبر تبدیل کیے، بابر کبھی نمبر 3 پر چلاجاتا ہے، کبھی اوپن آجاتا ہے، میرے لیے پاکستان پہلے ہے : کپتان پشاور زلمی

ذیشان مہتاب بدھ 30 اپریل 2025 13:50

مجھ سے زیادہ کسی نے اپنی بیٹنگ پوزیشن کی قربانی نہیں دی، بابر اعظم کا دعویٰ

لاہور (اردو پوائنٹ تازہ ترین اخبار ۔ 30 اپریل 2025ء ) پشاور زلمی کے کپتان بابر اعظم نے اپنی بیٹنگ پوزیشن کے بارے میں حالیہ قیاس آرائیوں کو دور کرتے ہوئے واضح کیا ہے کہ انہوں نے کبھی بھی لائن اپ میں کسی مخصوص جگہ پر کھیلنے پر اصرار نہیں کیا۔

افواہوں پر ردعمل دیتے ہوئے بابر نے کہا کہ میرے جتنے عہدے کسی نے نہیں بدلے۔ میں نے چھٹے نمبر پر بیٹنگ کی اور اوپننگ بھی کی۔

چاہے وہ فرنچائز کے لیے ہو یا قومی ٹیم کے لیے ،میں ہمیشہ وہیں کھیلتا ہوں جہاں مجھے ضرورت ہوتی ہے۔ میں نے کبھی نہیں کہا کہ میں خراب کارکردگی کے خوف سے کسی خاص نمبر پر بیٹنگ نہیں کروں گا۔

بابر اعظم نے جدید کرکٹ میں اسٹرائیک ریٹ اور جارحانہ کھیل کے بارے میں جاری بحث پر بھی تبصرہ کیا۔ انہوں نے کہا کہ میں اپنے کھیل کے مطابق کھیلتا ہوں اور سمجھتا ہوں کہ کرکٹ کس طرف جا رہی ہے، میں جانتا ہوں کہ لوگ اسٹرائیک ریٹ اور جارحانہ کھیل کے بارے میں بات کرتے ہیں، مجھے کسی کو یہ ثابت کرنے کی ضرورت نہیں کہ میں کس قسم کا کھلاڑی ہوں سب پہلے ہی جانتے ہیں۔

(جاری ہے)

میں ہمیشہ صورتحال اور ٹیم کی ضروریات کے مطابق کھیلتا ہوں۔ میں اپنے اسٹرائیک ریٹ سے پوری طرح واقف ہوں۔

انہوں نے مزید واضح کیا کہ ٹی ٹونٹی میچوں میں ان کی شرکت کے بارے میں فیصلے سلیکٹرز اور کوچز کرتے ہیں، وہ نہیں کرتے۔ بابر نے مزید کہا کہ 'یہ مجھ پر منحصر نہیں ہے کہ مجھے کھیلا جائے یا آرام دیا جائے، میرا کام ٹی ٹونٹی، ون ڈے یا ٹیسٹ کرکٹ پرفارم کرنا ہے، مجھے بتایا گیا کہ مجھے ٹی ٹونٹی سے آرام دیا جا رہا ہے، دیکھتے ہیں کہ وہ آگے کیا فیصلہ کرتے ہیں۔'

وقت اشاعت : 30/04/2025 - 13:50:35