ویسٹ انڈین بیٹر نے اے بی ڈیویلیئرز کا تیز ترین ففٹی کا ریکارڈ برابر کردیا

میتھیو فورڈ نے یہ اعزاز آئرلینڈ کیخلاف دوسرے ون ڈے میچ میں حاصل کیا

ذیشان مہتاب ہفتہ 24 مئی 2025 13:47

ویسٹ انڈین بیٹر نے اے بی ڈیویلیئرز کا تیز ترین ففٹی کا ریکارڈ برابر کردیا

ڈبلن (اردو پوائنٹ تازہ ترین اخبار ۔ 24 مئی 2025ء ) ویسٹ انڈیز کے میتھیو فورڈ نے آئرلینڈ کے خلاف دوسرے ون ڈے میچ میں صرف 16 گیندوں پر نصف سنچری بنا کر جنوبی افریقہ کے اے بی ڈی ویلیئرز کا تیز ترین ففٹی کا عالمی ریکارڈ برابر کردیا۔

ڈی ویلیئرز نے یہ ریکارڈ 2015ء میں جوہانسبرگ میں ویسٹ انڈیز کے خلاف 149 رنز کی دھواں دار اننگز کھیلتے ہوئے قائم کیا تھا۔

(جاری ہے)

23 سالہ میتھیو فورڈ ایک موقع پر صرف 13 گیندوں پر 42 رنز پر موجود تھے اور ڈی ویلیئرز کا ریکارڈ توڑنے کے قریب تھے لیکن بیری میکارتھی کی گیند پر ریمپ شاٹ کھیلنے کی کوشش ناکام ہوئی تاہم اگلی دو گیندوں پر لانگ آف اور کور کے اوپر لگائے گئے شاندار چھکوں کی مدد سے وہ ڈیویلیئرز کے ریکارڈ کے ساتھ برابری پر آ گئے۔

فورڈ نے مجموعی طور پر صرف 19 گیندوں پر 58 رنز بنائے جس میں دو چوکے اور آٹھ چھکے شامل تھے۔

اس طرح ان کے 96.55 فیصد رنز باؤنڈریز کے ذریعے آئے جو ون ڈے کرکٹ کی تاریخ میں 50 یا اس سے زائد رنز کی اننگز میں سب سے زیادہ تناسب ہے۔

اس سے قبل یہ ریکارڈ 2009ء میں آندرے فلیچر کے پاس تھا جنہوں نے بنگلادیش کے خلاف باسٹیئر میں 52 میں سے 50 رنز باؤنڈریز سے بنائے تھے۔

وقت اشاعت : 24/05/2025 - 13:47:41